Засгийн газрын тусгай сангуудыг тултал ашиглаж, гадаадын их сургуульд суралцсан, мөн бизнесээ тэтгэн тэрбумтан болсон УИХ, Засгийн газрын гишүүн бол Ж.Энхбаяр гэдэгтэй монголчууд маргахгүй бизээ. Гэвч Боловсролын зээлийн сангаас авсан зээлийнхээ хүүг төлөхгүй луу унжих болсон нь Засгийн газрынхаа нэр хүндийг ч сэвтээж буй. Боловсролын зээлийн сангийн ажлын албаны дарга асан О.Сийлэгмаа сайд Ж.Энхбаярыг зээлийн хүүгээ төлж, нэг ч гэсэн залууд сурах боломж олгох ёстойг сануулсан ч өдийг хүртэл гүрийсээр байгаа юм.

Төлөх мөнгөгүйдээ бус төлөх сэтгэлгүйдээ байна гэж хэлж болно. Учир нь тэрбээр УИХ-ын 2024 оны сонгуульд нэр дэвших үеэрээ Авлигатай тэмцэх газарт гаргасан Хөрөнгө орлогын мэдүүлэгтээ нийт орлого жилийнх нь 2.7 тэрбум, 4.9 тэрбумаар үнэлэгдэх үл хөдлөх хөрөнгөтэй, хадгаламжиндаа 3.7 тэрбумтай, 1.2 тэрбумын авлагатай гэж мэдүүлсэн нь бий.  Ийм их хөрөнгө, мөнгөтэй тэрбумтан хүн зээлийн хүү төлөхөд горойх зүйлгүй. Гэвч гүрийсээр байгаа нь цаашдынх нь улс төрийн карьерыг ч дуусгаж мэдэх талтай.

Уг нь, ирэх онд болох 2027 оны Ерөнхийлөгчийн сонгуульд МАН-аас нэр дэвшиж мэдэх кандидат бол УИХ-ын гишүүн, Эдийн засаг хөгжлийн сайд Ж.Энхбаяр гэж улс төрийн хүрээнийхэн ярьдаг. Гэтэл Боловсролын зээлийн сангаас авсан зээлийнхээ хүүг төлөхгүй, шаардаад байхад ч үл тоож буй нь энэ мэт сунгаанд ороход эргээд гай болж мэдэх юм шүү.

Яг үнэндээ дээрх зээлийн хүчээр гадаадын их дээд сургуульд суралцаж боловсрол эзэмшсэнээр улс төрийн карьер ч ахисан, бас бизнес нь амжилт олоход ч сурсан мэдсэн зүйл нь зөндөө л хэрэг болоо байлгүй. Үр шимийг нь хэд дахин нугалж хүртчихээд бусдад боломж олгохгүй байх нь муухай шүү дээ, сайд аа.

Нэг танхимд тохой залган суудаг, Гадаад харилцааны сайд Б.Батцэцэг саяхан тус сангаас авсан зээлээ төлснөөр гол усаар л нэг шуугиан болж, баяр хөөр болцгоолоо. Одоо сайд Ж.Энхбаяр та төлж нэг ч гэсэн залууд боломж олгоно уу даа.

Түүний Хөрөнгө орлогын мэдүүлгийг https://xacxom.iaac.mn/xacxom/5800445 линкээр орж харах боломжтой.

Г.ХОРОЛ