Үе тэнгийн хүүхдүүдээ зодож, бичлэг хийсэн гэх хэрэгт холбогдсон Д.Саянаа нарын таван хүүхдийг яллагдагчаар татаж, хилийн хориг тавьсан талаар бид өмнө нь мэдээлсэн. Тэгвэл уг хэргийг шалгаж дуусаад, шүүхэд шилжүүлэх саналтайгаар прокурорт хүргүүлжээ.

Тэднийг бүлэглэн заналхийлсэн, цахим орчинд хувь хүний нууцтай холбоотой мэдээлэл тараасан, мөн бусдын биед хөнгөн гэмтэл учруулсан гэх үндэслэлээр шалгаж байгаа аж.

Тодруулбал, Эрүүгийн хуулийн 13.5 дугаар зүйлд “бүлэглэж заналхийлсэн” тохиолдолд торгох, зорчих эрхийг хязгаарлах, эсвэл хоёр жил хүртэл хугацаагаар хорих ялтай байхаар заасан байдаг.

Мөн 13.11 дүгээр зүйлд цахим сүлжээ ашиглан хувь хүний нууцыг задруулсан бол торгох, зорчих эрх хязгаарлах, эсвэл тав хүртэл жилийн хорих ял оногдуулах боломжтой гэжээ. Харин 11.6 дугаар зүйлд бусдын эрүүл мэндэд санаатайгаар хөнгөн хохирол учруулсан тохиолдолд торгох, нийтэд тустай ажил хийлгэх, эсвэл зорчих эрхийг хязгаарлах ял шийтгэхээр тусгасан байна.