Сошиалаар “7 хоногт 5 кг хасна”, “хоолоо хасахгүй тураарай”, “унтахынхаа өмнө уугаад л болоо” гэх мэт сурталчилгаа тасрахгүй шахам болсон. Ялангуяа тураах кофе, цай, капсул зэрэг бүтээгдэхүүнүүд TikTok, Facebook, Instagram-аар дамжин охид, бүсгүйчүүдийн өдөр тутмын хэрэглээ мэт харагдах болсон нь анзаарагдана. Гэвч эдгээр бүтээгдэхүүн үнэхээр жин хасдаг уу, эсвэл бие махбодод өөр асуудал үүсгэдэг үү гэдгийг анхаарах цаг болжээ.

Ихэнх тураах бүтээгдэхүүн үнэндээ өөх хайлуулах биш, харин биеэс ус хөөх, гэдэс цэвэрлэх үйлчилгээтэй байдаг тул жин богино хугацаанд буусан мэт санагддаг. Гэвч энэ нь өөх хайлсан гэсэн үг биш. Харин ч биеэс ус, шим тэжээл алдагдаж байгаагийн илрэл байх магадлалтай. Үүний улмаас хэсэг хугацааны дараа хүмүүс эргээд жин нэмэх нь элбэг.

Мөн охид, бүсгүйчүүдийн дунд тураах бүтээгдэхүүн нь “их идэхгүй байхад тусалдаг” гэх ойлголт түгээмэл байдаг. Зарим бүтээгдэхүүн хоолны дуршил дарах үйлчилгээтэй ч удаан хугацаанд хэрэглэх нь ходоод, бодисын солилцоо, дааврын тэнцвэрт байдалд сөргөөр нөлөөлөх эрсдэлтэй. Ялангуяа өсвөр насныхан, оюутан залуусын хувьд ядрах, толгой эргэх, анхаарал төвлөрөхгүй болох зэрэг шинж тэмдэг илэрдэг талаар эмч мэргэжилтнүүд анхааруулсаар байна.

Сошиал дахь сурталчилгаа ихэвчлэн “өмнө ба дараа” гэх зураг, инфлүүнсерүүдийн туршлага дээр тулгуурладаг. Гэвч тухайн бүтээгдэхүүний найрлага тодорхой эсэх, эрүүл мэндийн байгууллагын зөвшөөрөлтэй юу гэдэг нь олон тохиолдолд ойлгомжгүй байдаг. Зарим бүтээгдэхүүн бүр монгол хэл дээрх тайлбаргүй, хаана үйлдвэрлэсэн нь тодорхойгүй байх нь ч бий. Олон хүн хэрэглэж байна гэдэг нь аюулгүй гэсэн баталгаа биш гэдгийг мэргэжилтнүүд сануулдаг.

Нөгөө талдаа, ийм төрлийн контент охид, бүсгүйчүүдэд сэтгэлзүйн дарамт үүсгэх эрсдэлтэй гэх судалгаа бий. Туранхай байх ёстой гэсэн ойлголт сошиалаар улам хүчтэй түгэж, хүмүүс өөрийн бие галбиртаа сэтгэл хангалуун бус болох, өөрийгөө бусадтай харьцуулах хандлага нэмэгдэж байна.

Ингэснээр эрүүл амьдралын хэв маяг бус, богино хугацаанд хурдан турах арга хамгийн чухал мэт ойлголт түгээмэл болжээ. Мэргэжлийн хүмүүсийн хэлдгээр жин хасах хамгийн тогтвортой арга нь хангалттай нойр авах, зөв хооллох, тогтмол хөдөлгөөн хийх хэвээр байна. Харин ид шидийн мэт амлалттай бүтээгдэхүүнүүдийн цаана ихэнхдээ бизнес, маркетинг явж байдаг.

Өнөөдөр сошиал хуудсаа хэдхэн минут гүйлгэхэд л тураах кофе, цайны сурталчилгаа гарч ирдэг болсон цаг. Гэхдээ хурдан үр дүн амласан бүхэн эрүүл, аюулгүй гэсэн үг биш гэдгийг хүмүүс илүү анзаарч эхэлж байна.