Израилийн ерөнхий сайд Беньямин Нетаньяху Ираны дайны оргил үед Арабын нэгдсэн Эмират улсад нууцаар айлчилж, тус улсын ерөнхийлөгч Шейх Мохамед бин Заид Аль Нахьянтай уулзжээ. Мөн энэхүү айлчлал нь Израиль, АНЭУ-ын харилцаанд түүхэн нээлт авчирсан гэж Нетаньяхугийн ажлын алба мэдэгдэв. Нетаньяху, Шейх Мохамед бин Заид Аль Нахьян нар гуравдугаар сарын 26-нд Оманы хилийн ойролцоох Аль Айнд хэдэн цагийн турш уулзжээ.

Гэвч Арабын нэгдсэн Эмират улсын Гадаад хэргийн яам Нетаньяхугийн айлчлалын талаарх мэдээллийг үгүйсгэж, үндэслэлгүй гэж мэдэгдэв.

Түүнчлэн Израилийн тагнуулын агентлагийн захирал Дэвид Барнеа Ираны дайны хугацаанд цэргийн ажиллагааг зохицуулахын тулд АНЭУ-д дор хаяж хоёр удаа айлчилсан гэж эх сурвалж мэдээлэв. Дэвид Барнеагийн айлчлалын үеэр Израиль улс агаарын довтолгооноос хамгаалах системээ АНЭУ-тай хуваалцсан байна.

АНУ-ын Израиль дахь Элчин сайд Майк Хакабигийн хэлснээр АНЭУ, Израилийн хооронд ер бусын харилцаа бий аж. АНЭУ нь 2020 онд Израильтай харилцаагаа хэвийн болгохыг зөвшөөрсөн анхны Исламын улс болсон бөгөөд түүний дараа Бахрейн, Марокко, Судан гэсэн гурван Исламын улс "Абрахамын тохиролцоонд" хүрсэн. Израиль, АНЭУ аль аль нь Трампын засаг захиргаатай нягт харилцаатай бөгөөд Ираны дайнд оролцсоноор энэ харилцаа улам гүнзгийрч байна.