БНХАУ-ын төрийн бодлогоор 2016 оноос эхлэн зэрэглэлээ ахиулсан уг төвийг 2024 оны нэгдүгээр сараас “Улаанцавын Хятад-Европын ачаа тээврийн шуурхай түгээлтийн төв” болгон өргөтгөжээ. Өнөөдөр 30 гаруй га талбайд үйл ажиллагаа явуулж буй тус төвд төмөр зам, авто замын тээвэр, үйлдвэрлэл, агуулахын цогц үйлчилгээ нэг дор төвлөрсөн байна. ӨМӨЗО-ны хүнс, хөдөө аж ахуйн бүтээгдэхүүнийг Европын зах зээлд нийлүүлэхийн зэрэгцээ Орос, Европоос орж ирэх уул уурхай, мод зэрэг түүхий эдийг боловсруулан Хятадын дотоодын зах зээлд нийлүүлдэг аж.

Жилдээ Хятад-Европын чиглэлд 1086 удаагийн галт тэрэгний цуваа явуулдаг. Үүнд хүнс, тоног төхөөрөмж, автомашин зэрэг барааг голлон тээвэрлэдэг байна.

Улаанцав-Эрээн хотын Үндэсний логистикийн төв паркийн Удирдлагын хорооны Эдийн засгийн хөгжлийн газрын захирал Жон Дун Ён “Бээжин болон Хойд Хятадын үйлдвэрлэлийн бүтээгдэхүүнийг Европ руу гаргах, Тяньжиний боомтын ачааг Монгол, Орос болон хойд бүс нутаг руу түгээх гол зорилготой. Мөн манай төвөөр дамжин зарим аж ахуйн нэгж бүтээгдэхүүнээ савлах, ангилах, боловсруулах үйлдвэрлэл явуулдаг. Одоогоор 30 мянган тонн самрын үрийг Европ руу экспортолж байна” гэв. Тус парк нь гаалийн баталгаат үйлчилгээ, орчин үеийн логистик, олон улсын худалдаа, үйлдвэрлэлийг хослуулсан цогц бүс болон хөгжиж байгаа бөгөөд 2024 оны байдлаар 21 аж ахуйн нэгж үйл ажиллагаа явуулж байна.

Нийт үйлдвэрлэлийн өртөг нь 2.51 тэрбум юаньд хүрч, өмнөх оноос 27 хувиар өсчээ.

Үүнээс аж үйлдвэрийн бүтээгдэхүүний өртөг 2.28 тэрбум юаньд хүрсэн бол тээвэр, агуулахын орлого 220 сая юань болж 25 хувиар өссөн үзүүлэлттэй байна. Цаашид Монгол Улстай хамтран Европ руу чиглэх ачаа тээврийг нэмэгдүүлэх, цувааны хүлээгдлийг бууруулах шаардлагатай байгааг онцлов. Учир нь Казахстанаар дамждаг маршрутаас 2800 км-ээр богино гэж тооцогддог Улаанцав-Эрээн-Монгол-Оросын төмөр замын коридор нь Европ хүрэх шинэ гарцын нэгээр нэрлэгдэж байна.