ОХУ-ын ерөнхийлөгч Путин аюулгүй байдлынхаа төлөө олон долоо хоног газар доорх хонгилд бүгж, дайныг тэндээс удирдаж байгаа гэж барууны хэвлэлүүд саяхан шуугисан. Европын тагнуулын тайланд үндэслэсэн гэх энэ мэдээлэл Ялалтын баярын өмнөхөн гарсан билээ.

Гэвч Оросын албаныхан энэ таамгийг утгагүй зүйл гэж няцаасан. Үүний зэрэгцээ Даваа гаригийн /2026.05.11/ орой Кремлийн албан ёсны цахим хуудсанд дээр таамаглалын хариу болгож, Путины өөр нэгэн бичлэгийг нийтэлжээ.

Тус бичлэгт Путин Москвагаар машинтай давхиж, хотын төвийн зочид буудлын гадаа бие хамгаалагчтайгаа ирэх аж. Тэрбээр том цэцгийн баглаа барин дотогш ороод, багш Вера Гуревичтэйгээ уулзжээ. 73 настай Путин жинсэн өмд, цайвар хүрэм өмссөн энгийн дүр төрхтэй байжээ. Мөн тэрбээр багшаа тэвэрч, хацар дээрээ үнсүүлж байгаа нь бичлэгт харагдана. Путин зочид буудалд гэр бүлийн хамт орж ирсэн нэгэн үл таних хүнтэй цаг агаарын талаар товч ярилцсаныхаа дараа багшийгаа машиндаа суулгаад Кремль рүү авч явж, оройн зоог барьжээ.

Кремлийн мэдэгдэлд дурдсанаар ерөнхийлөгч Путин багшийгаа Улаан талбайн парадад урьж, улмаар Москва хотын соёлын хөтөлбөрт хэд хоног оролцуулах болсон байна.

Энэ бичлэгээр дамжуулан Кремль ерөнхийлөгч Путиныг ард түмнээсээ улам тасарч, бодит байдлаас холдож буй гэх шүүмжлэлд няцаалт өгсөн бололтой. 1999 оноос хойш засгийн эрхэнд буй Путины одоогийн бүрэн эрхийн хугацаа 2030 онд дуусах ёстой. Түүний нэр хүнд сүүлийн саруудад буурсан ч төрийн санал асуулгын байгууллагуудын мэдээллээр бол өндөр хэвээр байгаа аж.