Цахим спортын "CS2" төрлийн "PGL Astana 2026" тэмцээн Казахстанд үргэлжилж байна. 800 мянган ам.долларын шагналын тэмцээнд дэлхийн болон бүс нутгийн шилдгүүд урилгаар, сонгон шалгаруулалтаар орж байгаа юм.

Өнөөдөр/2026.05.12/ тэмцээний дөрөв дэх өдөр Монголын хоёр баг болох "The MongolZ" болон "The Huns" нар тоглов. "The MongolZ"-ийн хувьд хожвол плей-оффд шалгарч, "The Huns" хожигдвол хасагдах байлаа.

"The MongolZ" баг "Falcons"-той учраа таарч, 1-2 гэсэн харьцаатай хожигдлоо. Эхний "Dust2" мап дээр "Falcons" хожиж, Монголын баг "Inferno" дээр хариуг нь барьсан. Улмаар шийдвэрлэх "Mirage" мап дээр "The MongolZ" илүү байсан ч хожлоо баталгаажуулж чадсангүй. Нэмэлт цагт Саудын Арабын баг хожиж, плей-оффд шалгарав. "The MongolZ" баг маргааш плей-оффын эрхийн төлөөх сүүлийн тоглолтоо хийнэ.

Харин "The Huns" баг хожигдох эрхгүй тоглолтыг Украины "Monte"-ийн эсрэг хийж, мөн л шийдвэрлэх мап дээр нэмэлт цагт хожигдлоо. "Mirage" дээр болсон шийдвэрлэх мапын тоглолтод Монголын баг тааруу эхэлсэн ч хоёрдугаарт хагаст раундын зөрүүг багасгаж, тэнцүүлж чадсан. Харамсалтай нь, нэмэлт цагт боломж гарсангүй. Тэд нэг хожил, гурван хожигдолтойгоор тэмцээнээ өндөрлүүллээ.