Японы ерөнхий сайд Санаэ Такаичи тагнуул, кибер аюул заналхийлэл болон саарал бүсийн ажиллагаанд одоогийн бүтэц нь хэтэрхий сул задгай байна гэсэн болгоомжлолын үүднээс төвлөрсөн тагнуулын байгууллагыг байгуулах хууль тогтоомжийг урагшлуулж байна. Энэ нь дэлхийн хоёрдугаар дайнаас хойших Японы анхны төвлөрсөн тагнуулын байгууллага болох юм. АНУ-ын Холбооны мөрдөх товчоо уг төлөвлөгөөг дэмжин ажиллаж байна.

Төлөвлөгөөний дагуу Японы Засгийн газрын тагнуул, судалгааны алба буюу "CIRO"-г шинэчлэн, төрийн байгууллагууд болон хувийн хэвшлээс шинжээчид, технологийн мэргэжилтнүүд, үйл ажиллагааны ажилтнуудыг нэгтгэсэн төв байгууллага болгон өөрчлөх юм. Зөвлөхүүдийн танхим уг төлөвлөгөөг эцэслэн баталвал тус шинэ алба ирэх долдугаар сараас үйл ажиллагаагаа явуулж магадгүй. Шинэ алба эхний ээлжинд 700 орчим ажилтантай байна гэж тооцоолжээ.

Одоогийн Засгийн газрын тагнуул, судалгааны албаны дарга Казүяа Хара өнгөрсөн долоо хоногт Вашингтон хотноо Холбооны мөрдөх товчооны захирал Каш Пателтай уулзаж, шинэ агентлагийн бүтэц, чиг үүргийн талаар танилцуулжээ. Каш Пател Японы төлөвлөгөөг өндрөөр үнэлж, энэхүү шинэ байгууллага нь хоёр улсын хамтын ажиллагааг ихээхэн бэхжүүлнэ гэжээ. Мөн Японы яамдын дунд олон жил тархай бутархай байсан тагнуулын мэдээллийг уг алба төвлөрүүлж чадна гэж үзэж байна.

Төвлөрсөн тагнуулын байгууллага байгуулах үйл явцад АНУ оролцох нь сургалт болон туршлага хуваалцах тал дээр томоохон давуу тал болох юм.

Олон улсын хямралын бүлгийн Тайваньд төвтэй шинжээч Уильям Ян хэлэхдээ "Такаичи энэ санаачлагаар юунд хүрэхээ тодорхой сайн мэдэж байгаа. Энэ агентлаг байгуулагдаж буй нь Япон өнөөдөр ямар хэмжээний аюул, заналхийлэл мэдэрч байгааг харуулж байна" гэжээ.

Такаичигийн төлөвлөж буй агентлаг нь хүйтэн дайны үеийн уламжлалт тагнуулын байгууллага биш юм. Цаг үеэ дагаад тус байгууллагад стратегийн өрсөлдөгч орнуудын талаар гүн гүнзгий мэдлэгтэй, хэлний өндөр чадвартай туршлагатай шинжээчид, орчин үеийн тагнуулын ажилд шаардлагатай асар их хэмжээний өгөгдлийг боловсруулах хиймэл оюуны мэргэжилтнүүдийг элсүүлэхээр зорьж байна. Үүний зэрэгцээ Японы хувьд стратегийн өндөр ач холбогдолтой Хятад, Хойд Солонгос, Орос зэрэг улсад ажиллаж байсан туршлагатай хүмүүсийг хайж байгаа аж.