Төрийн соёрхолт, Соёлын гавьяат зүтгэлтэн яруу найрагч Ш.Гүрбазар өнөөдөр хүнд өвчний улмаас таалал төгссөн. Түүнийг тэнгэрт дэвшсэн тухай мэдээллүүд олон нийтийн сүлжээгээр хөвөрч, учир мэдэх хүмүүс түүний уран бүтээлийн үүх түүхийг нэхэн дурсч, эмгэнэл илэрхийлсээр байна. Үүний зэрэгцээ манай улсын соён гэгээрүүлэх ёстой Соёлын яамны цаашлаад төрийн албаныхны ажилдаа хэрхэн ханддаг хандлага ил болов. Нэгдүгээрт, Соёлын яамнаас нэрт яруу найрагч агсанд эмгэнэл илэрхийлэхдээ ChatGPT ашигласан гэх шүүмжлэл олны дургүйцлийг хүргээд байна. Мөн түүний уран бүтээлийг андуурч хэлсэн нь сахил хүртэх гээд шал дордов гэгч болов. Үнэхээр мэддэггүй юм бол учир мэдэх хүмүүсээс асууж тодруулаад жаахан сэтгэл гаргасан бол ийм асуудалд орохгүй байх байлаа.

Тэдний энэ хандлагаас ажилдаа хэрхэн ханддаг цаашлаад монголчуудын сэтгэлд хоногшсон гайхалтай уран бүтээл туурвиж хэдийн өөрийн нэр төрийг дархалсан эрхэм хүмүүний бүтээлийг мөн л бидний сайн мэдэх уран бүтээл нь маань шиг хэлэгддэг болсон Монгол Улсын Хөдөлмөрийн баатар, Ардын уран зохиолч, Төрийн шагналт, Соёлын гавьяат зүтгэлтэн яруу найрагч Бавуугийн Лхагвасүрэн, Төр нийгмийн нэрт зүтгэлтэн, яруу найрагч О.Дашбалбар агсны уран бүтээлээс иш татаж тавина гэдэг үндсэндээ доромжлол гэхэд хилсдэхгүй. Адаглаад л түүний

Хөх Азийн цээжин дээр ирж буцахын учир
Хүмүүний алтан заяа энд байхын учир
Туурайн тамгатай хөрсөн дээр
Унагатай хамт тэнцэж хөлд орохын учир
Тунгалаг шандны толиог
Хулантай хамт булаалдаж рашаан амсахын учир
Би Монголдоо мэндэлсэн
Газар тэнгэрийн савслагад гайхуулан байж
Ганц яваа насаараа би Монголоороо гоёно      /Ш.Гүрбазар Би Монголоороо гоёдог/

Гэдэг шүлгийг мэдэхгүй монгол хүн ховор баймаар. Энэ мөр эхлэхэд л түүний уншиж буй биеийн хэлэмж харагдаж хоолойны өнгө сонсогдох хүртэл монголчуудын чихэнд хоногшсон байлтай. Тэнэгийн дуугүй нь үзэмжтэй гэх үг бий. Мэдэхгүйгээ мэдэмхийрч байхаар асууж лавлаад сурчихвал далайд дусал нэмэр гэдэг шүү "соёлгүй" Соёлын яамныхаан!