Нийслэлийн Засаг дарга Х.Нямбаатарын нэгдүгээр орлогчоор Баянзүрх дүүргийн Засаг даргаар ажиллаж байсан Г.Жаргалсайханыг томилов. Тэрбээр нийгмийн салбар, ногоон хөгжил болон агаар, орчны бохирдлын асуудал хариуцан ажиллах бол А.Амартүвшин нь Т.Даваадалайгийн хариуцаж байсан Эдийн засгийн хөгжил, дэд бүтцийн асуудлыг хариуцан ажиллахаар болж байна.

Нийслэлийн шинэхэн орлогч дарга Г.Жаргалсайхан нь 2024 онд БЗД-ийн Засаг даргаар Г.Жаргалсайхан ажилласан бөгөөд өмнө нь тус дүүргийн Засаг даргын орлогчоор ажиллаж байв. Ингээд түүний хөрөнгө орлогын мэдүүлгийг хүргэе.

Тэрбээр хамгийн сүүлд АТГ-т 2020-2024 онд хөрөнгө орлогоо мэдүүлжээ. Түүний өөрийн орлого нь 2023 онд 25 сая төгрөг байсан бол 2024 онд бараг тав дахин буюу 109 сая төгрөг болжээ. Харин гэр бүлийн ямар нэгэн орлогогүй гэсэн байна. Мөн нэг нийтийн орон сууцаа 160 сая төгрөгөөр үнэлсэн байна. Мөн "Hyundai" маркийн нэг суудлын жижиг автомашинаа 16 сая төгрөг, 32 адуу, 52 үхрээ 178 сая төгрөгөөр үнэлжээ. Харин 33 сая төгрөгийн үнэт эдлэлтэй, дотоодын арилжааны банкинд 5.2 сая төгрөгийн хадгаламжтай бөгөөд 2023 онд 250 сая төгрөгийн авлагатай байсан бол 2024 онд 290 сая төгрөг болжээ. Үүнээс гадна 97 сая төгрөгийн зээлтэй, 153 сая төгрөгийн өв залгамжлалтай гэж мэдүүлжээ.