Энэ оны дөрөвдүгээр сард улсын хэмжээнд инфляци 10.1 хувьд хүрч, өмнөх оны мөн үеэс 1.5 нэгж хувиар өссөн үзүүлэлттэй гарлаа. Мөн өмнөх сараас хэрэглээний бараа, үйлчилгээний үнэ 2.8 хувиар нэмэгдсэн нь үнийн өсөлт эрчимжиж байгааг харуулж байна. Үндэсний статистикийн хорооноос мэдээлснээр инфляцийн өсөлтөд хамгийн их нөлөөлсөн нь хүнсний бүтээгдэхүүний үнэ байв. Тодруулбал, хүнсний бараа, ундаа, усны бүлгийн үнэ жилийн дүнгээр 19.3 хувиар өсөж, нийт инфляцын 5.4 нэгж хувь буюу 53.1 хувийг бүрдүүлжээ. Үүнээс гадна тээврийн үйлчилгээний үнэ 5.9 хувь, боловсролын үйлчилгээ 12.8 хувь, хувцас, бөс бараа, гутлын үнэ 6.4 хувиар өссөн нь үнийн ерөнхий түвшинд нөлөөлсөн байна.

Бүсчилсэн байдлаар авч үзвэл Улаанбаатар хотод хүнсний бүтээгдэхүүний үнэ 20.9 хувиар өссөн нь хамгийн өндөр үзүүлэлт болсон бол төвийн бүсэд барааны үнэ 12.1 хувь, баруун болон хангайн бүсэд хүнсний бус барааны үнэ 7.2 хувь, баруун бүсэд үйлчилгээний үнэ 8.7 хувиар өссөн дүнтэй гарчээ.

Харин сарын өсөлтийн хувьд дөрөвдүгээр сард хүнсний бараа, ундаа, усны бүлгийн үнэ өмнөх сараас 5.7 хувиар, тээврийн бүлгийн үнэ 4.9 хувиар өссөн нь инфляци огцом нэмэгдэхэд голлон нөлөөлсөн байна.

Ялангуяа мах болон өргөн хэрэглээний хүнсний бүтээгдэхүүний үнэ улирлын шинжтэйгээр өссөн нь өрхийн өдөр тутмын зардлыг нэмэгдүүлжээ.

Түүнчлэн инфляцад импортын барааны нөлөө мөн өндөр хэвээр байна. Дөрөвдүгээр сарын инфляцын 2.9 нэгж хувь буюу 28.9 хувь нь импортын барааны үнийн өсөлтөөс шалтгаалсан байна. Хэрэглээний сагсанд багтдаг 430 нэр төрлийн бараа, үйлчилгээний 238 нь импортын бүтээгдэхүүн бөгөөд нийт сагсны 55.3 хувийг эзэлдэг аж. Иймээс валютын ханш болон гадаад зах зээлийн үнийн өөрчлөлт дотоодын инфляцад шууд нөлөөлж байгааг эдийн засагчид онцолж байна.

Мөн бензин, түлшнээс бусад импортын барааны үнэ инфляцад 1.9 нэгж хувийн нөлөө үзүүлсэн бол мах, хатуу түлшнээс бусад дотоодын барааны үнэ 3.7 нэгж хувийн нөлөө үзүүлжээ. Энэ нь зөвхөн импортын хүчин зүйл бус, дотоодын нийлүүлэлт болон хэрэглээний зардлын өсөлт инфляцийн дарамтыг нэмэгдүүлж байгааг харуулж байна.

Сүүлийн жилүүдэд үйлчилгээний салбарын үнэ хамгийн өндөр өсөлттэй байсан бол энэ удаад хүнсний бүтээгдэхүүний үнэ давамгай өссөн дүр зураг ажиглагдаж байна. Тухайлбал, 2025 оны дөрөвдүгээр сард үйлчилгээний бүлгийн үнэ 17 хувиар өсөж байсан бол 2026 онд энэ үзүүлэлт 7.6 хувь болж саарсан ч хүнсний бүлгийн өсөлт эрчимжсэн нь инфляцийг хоёр оронтой түвшинд хүргэхэд голлон нөлөөлжээ.

Эдийн засагчдын үзэж буйгаар инфляцийн өндөр түвшин цаашид өрхийн бодит орлогод дарамт учруулж, хэрэглээ хумигдах эрсдэлийг нэмэгдүүлж болзошгүй байна. Тиймээс хүнсний нийлүүлэлтийг тогтвортой байлгах, импортын хараат байдлыг бууруулах, үнийн өсөлтийг тогтворжуулах бодлого чухал хэвээр байгааг онцолж байна.