Монголын Үндэсний Бөхийн Холбооноос 2026 оны тавдугаар сард зохион байгуулагдах үндэсний бөхийн албан ёсны барилдаан, үйл ажиллагааны хуваарийг танилцуулсан.

Тухайлбал, өнөөдөр буюу тавдугаар сарын 9-нд Ховд аймгийн Дөргөн сумын түүхт 70 жилийн ойд зориулсан, БНМАУ-ын начин Л.Бандихүүгийн нэрэмжит улс, аймаг, цэргийн цолтой 128 бөхийн барилдаан болно. Түүнчлэн тавдугаар сарын 10-нд Баянзүрх уулын хишиг барилдаан болон Сүхбаатар аймгийн Баруун-Урт хотод зохион байгуулагдах “Жавхлант шарга” холбооны 30 жилийн ойд зориулсан 128 бөхийн барилдаан тус тус болно.

Сарын дунд үед буюу тавдугаар сарын 15-нд Монголын үндэсний бөхийн холбооны аравдугаар Их Эе хурал хуралдах бөгөөд энэ нь салбарын бодлого, зохион байгуулалтын чухал шийдвэрүүдийг хэлэлцдэг арга хэмжээ юм. Үүний дараа тавдугаар сарын 16-нд Даншгийн дархан аварга С.Чүлтэмийн нэрэмжит 128 бөхийн барилдаан, тавугаар сарын 17-нд “Алтан Жолоо Групп” ХХК-ийн нэрэмжит улсын арслан цолны хүндэтгэлийн уламжлалт барилдаан тус тус үргэлжлэх юм.

Харин тавдугаар сарын 23-нд Завхан аймгийн Эрдэнэхайрхан сумаас төрөн гарсан улсын цолтнуудын нэрэмжит барилдаан болох бол тавдугаар сарын 24-нд сумын цолтон болон залуу бөхчүүдийн барилдаан, мөн Өмнөговь аймгийн Даланзадгад хотод Б.Шоовдорын нэрэмжит 128 бөхийн барилдаан зэрэг олон арга хэмжээ зохион байгуулагдана.

Сарын төгсгөлд буюу тавдугаар сарын 30-нд Өмнөговь аймгийн Манлай сумын харьяат Г.Дэмүүлийн нэрэмжит барилдаан болох бөгөөд тавдугаар сарын 31-нд улс, аймаг, цэргийн цолтой 256 бөхийн оролцоотой улсын баяр наадмын сорилго барилдаанаар тавдугаар сарын үндэсний бөхийн тэмцээн өндөрлөх юм.