Жил бүрийн тавдугаар сар болон есдүгээр сарын Бямба, Ням гаригийг “Тэрбум мод” үндэсний өдөр болгон тэмдэглэдэг. Энэ хүрээнд дөрөвдүгээр сарын 25-наас эхлэн нийслэлийн дөрвөн байршилд мод, бут, сөөгийн суулгац, үр үрслэгээний өргөтгөсөн худалдааг зохион байгуулж байна.

Тодруулбал:

• Чингэлтэй дүүргийн 4 дүгээр хороо — Барилгачдын талбай
• Хан-Уул дүүргийн 15 дугаар хороо — Төв цэнгэлдэх хүрээлэн
• Баянзүрх дүүргийн 10 дугаар хороо — Экстрем спортын талбай
• Налайх дүүргийн 1 дүгээр хороо — Төв талбайд худалдаа гарч байгаа юм.

УБЗАА-ны Хотын ногоон байгууламж, цэцэрлэгжүүлэлтийн хэлтсийн дарга, Ерөнхий дендорлогич С.Эрдэнэсайхан "өргөтгөсөн худалдаанд 100 гаруй иргэн, аж ахуйн нэгж оролцож, мод бут, сөөгийн суулгац, үр үрслэгээ, хөрс бордоо болон зарим төрлийн тоног төхөөрөмж худалдаалж байна. Иргэдийг мод тарих бүх нийтийн өдөрт идэвхтэй оролцож, хотынхоо өнгө үзэмжийг сайжруулахыг уриалж байна" гэлээ.

Мөн өнгөрсөн амралтын өдрүүдэд буюу тавдугаар сарын 2, 3-нд нийслэлийн есөн байршилд бүх нийтийн мод тарих арга хэмжээг зохион байгуулжээ. Арга хэмжээнд 57 байгууллагын 1176 албан хаагч оролцож, 13 мянга орчим мод, бут, сөөг тарих ажлыг эхлүүлсэн байна.

Бүх нийтийн мод тарих ажил тавдугаар сарыг дуустал Бямба, Ням гариг бүр үргэлжлэх бөгөөд иргэн, аж ахуйн нэгжүүд дараах байршлуудад мод тарих боломжтой юм. Үүнд:

• Баянгол дүүрэг — Баянгол цэцэрлэгт хүрээлэн
• Баянзүрх дүүрэг — Хар усан тохойн мод үржүүлгийн газар, Үндэсний цэцэрлэгт хүрээлэн, Олон улсын “Эко” цэцэрлэгт хүрээлэн IGM
• Налайх дүүрэг — Шинэ Налайх цэцэрлэгт хүрээлэн
• Сонгинохайрхан дүүрэг — Инчон цэцэрлэгт хүрээлэн
• Хан-Уул дүүрэг — Түргэний цэцэрлэгт хүрээлэн, Айцын ам
• Чингэлтэй дүүрэг — Хойморь хайрхан.