Нийслэлийн Сонгинохайрхан дүүргийн "Хүйн хурд" морин спорт, уяачдын холбооноос уламжлал болгон зохион байгуулдаг "Сонгинохайрхан хурд-2026" хурдан морины уралдаан өнөөдөр /2026.05.11/ Хүй долоон худагт эхэлж байна. Энэ удаагийн уралдаанд хязаалан, шүдлэн, даага болон сонгомол бага, дунд насны морьд тоосоо өргөж, хурд хүчээ сорих юм.

Зохион байгуулагчдын зүгээс түрүү морьдын бай шагналыг хязаалан болон даага насны уралдаанд түрүүлсэн хүлгүүдэд мотоцикл, харин шүдлэн болон сонгомол ангиллын насны морьдод мөнгөн шагнал олгохоор төлөвлөжээ. Уралдааны аюулгүй байдлыг хангах үүднээс оролцох хүүхэд бүрийг ослын даатгалд бүрэн хамруулсан байх, мөн хамгаалалтын иж бүрэн хувцас хэрэглэлтэй оролцох шаардлагыг тавьж байна.

Уралдах морьдын бүртгэл зөвхөн уралдааны өмнө болох бөгөөд бүртгэлийн хураамж 100 мянган төгрөг гэнэ.