Хоёр дахь жилдээ дараалан тавдугаар сарын дундуур Казахстаны нийслэлд дэлхийн шилдэг багууд оролцсон томоохон CS2 тэмцээн болох гэж байна. PGL Astana 2026-г юугаараа онцгой болгож байгаа болон ямар багууд түрүүлэх хамгийн өндөр магадлалтай байгааг хамтдаа сонирхоё.

PGL Astana 2026 тэмцээний формат ба оролцогчид

Тэмцээн тавдугаар сарын 9-17-ны хооронд болох бөгөөд нийт 16 баг 1.6 сая ам.долларын шагналын сангийн төлөө өрсөлдөнө.

Зохион байгуулагчид Valve-ийн гуравдугаар сарын чансаанд үндэслэн дэлхийн шилдэг 12 багт шууд урилга өгсөн бол үлдсэн дөрвөн эрх бүсийн сонгон шалгаруулалтаар шийдэгдсэн. Харин дэлхийн чансааны эхний 10 багаас ердөө гурав нь болох Vitality, NAVI, Astralis урилгаа хүлээн аваагүй байна.

Монголчуудын хувьд энэ удаагийн тэмцээн онцгой ач холбогдолтой. Учир нь Монголыг төлөөлсөн хоёр баг болох The MongolZ болон The Huns нар PGL Astana 2026-д оролцоно.  The MongolZ багийн тоглогч “mzinho” болон түүний ах “Bart4k” нар хүртэл хоорондоо учраа таарах боломжтой юм.

PGL Astana 2026-ийн гол фаворитууд

Өнгөрсөн жилийн адил өнөө цагийн CS2-ын ноёрхогч Team Vitality Астанагийн тэмцээнийг өнжихөөр шийдсэн нь бусад багуудад аваргын төлөө өрсөлдөх бодит боломжийг олгож байна. Францын баг эзгүй энэ үед PGL Astana 2026-ийн гол гурван фаворит дараах багууд болж байна.

Team Spirit

Шинэхэн ахлагч “magixx” үүрэгтээ аажмаар дасаж, багийн супер од “donk”-ийг чухал тулаануудад илүү үр дүнтэй ашиглаж эхэлжээ. Үүний үр дүнд Spirit энэ жил анх удаа IEM Rio 2026-ийн шигшээд шалгарсан. Хэдийгээр тэд финалд Vitality-д ялагдсан ч MOUZ болон Team Falcons зэрэг хүчтэй өрсөлдөгчдийг замдаа буулган авсан юм. Мөн тэд өнгөрсөн жилийн PGL Astana 2025 тэмцээний аварга гэдэг нь том давуу тал болж байна.

The MongolZ

Өнгөрсөн жил Астанад Монголын залуус плей-оффт хамгийн түрүүнд шалгарч, хэсгийн шатанд фаворит FURIA болон NAVI-г илт давуугаар хожсон. Гэвч дараа нь плей-оффын эхний тоглолтдоо Aurora-д санаанд оромгүй байдлаар ялагдсан билээ.

Шинэ улиралд The MongolZ илүү тогтвортой тоглолт үзүүлж байгаа бөгөөд сэтгэлзүйн хувьд анхны том цомоо өргөхөд бэлэн болсон харагдаж байна. Тэд Spirit, Falcons, FURIA зэрэг ямар ч өрсөлдөгчийг буулгаж авах чадвартай. Тиймээс энэ удаагийн тэмцээнд шигшээд шалгарах нь багийн хамгийн доод зорилт гэж үнэлэгдэж байна.

Team Falcons

Ойролцоогоор 10 сая ам.долларын өртгөөр бүрдүүлсэн энэ супер баг эцэст нь жинхэнэ хүчээ харуулж эхэллээ. Саяхан болсон IEM Rio 2026 тэмцээнд Falcons дэлхийн тэргүүн баг Vitality-тай эн тэнцүү өрсөлдөж, гуравдугаар байрын төлөөх тоглолтод эзэн орны FURIA-г үзэгчдийнх нь өмнө ялсан.

Тэд энэ тэмцээний ямар ч багийг хожих чадвартай ч бүтэн тэмцээний турш тогтвортой байж чадах эсэх нь хамгийн том асуулт хэвээр байна.

Бусад өрсөлдөгчид

PGL Astana 2026-ийн бусад боломжит өрсөлдөгчөөр FURIA, MOUZ, PARIVISION багуудыг нэрлэж болох ч тэдний түрүүлэх магадлал харьцангуй бага гэж үзэж байна.

Бразилын FURIA багийн хувьд FalleN 2026 оны төгсгөлд зодог тайлна гэдгээ зарласны дараа сэтгэлзүйн хувьд уналтад орж, өөрсдийн нутагт болсон IEM Rio 2026 тэмцээний плей-оффын хоёр тоглолтдоо хоёуланд нь ялагдсан.

MOUZ баг Мэйжорын өмнө бүрэлдэхүүндээ том өөрчлөлт хийж, Jimpphat болон Brollan нарыг сэлгээнд суулган, академийн шинэ тоглогч xelex-ийг үндсэн баг руу дэвшүүлж, NAVI-ийн сэлгээнээс jL-ийг зээлээр авчирсан.

Харин улирлыг хүчтэй эхлүүлсэн PARIVISION сүүлийн тэмцээнүүдэд формоо бүрэн алдсан харагдаж байна.