Энэхүү ажлын хүрээнд зээлийн сахилга, хариуцлагыг дээшлүүлж, сангийн тогтвортой, ил тод үйл ажиллагааг хангана гэжээ. Энэ тухай салбарын сайд ярихдаа "Би дахин Боловсролын сайдаар ажиллаж байна. Хамгийн түрүүнд БЗС-гийн асуудалд цэг тавина. Би энэ сан дээр өнгөрсөн долоо хоногт очиж, ажилласан. Салбарын долоон сайдын 17 тушаал гарч, 800 орчим хүүхэд чөлөөлөгдсөн байдаг. Тэр асуудлаа одоо болтол яагаад шүүхээр эцэслэхгүй байна вэ. Тэр тушаал дунд миний гаргасан тушаал ч байгаа. Яг хэд нь нөхцөлөө биелүүлж, хэд нь нөхцөлөө биелүүлээгүй вэ гэдгээ нэг талд гаргах ёстой. Ойролцоогоор 160 орчим суралцагчийн асуудал байгаа даа. Бие биенийхээ нэр төрд хандахгүйгээр энэ сангийн хүртээмжийн асуудлыг ярья. Энэ жил гэхэд, дэлхийн шилдэг 100 их дээд сургуулийн хөтөлбөрт тэнцсэн хүүхдээс 10-ыг нь авах мөнгө байгаа. Жил бүр 100 орчим хүүхэд тэнцдэг. Бид тэр хүүхдүүдийг дахин шүүж, тэнцүүлж байгаа нь буруу юм. Тийм учраас цаашдаа дэлхийн шилдэг 100 их сургуульдаа тэнцэж, цаад сургуулиасаа тэтгэлгийн тодорхой хувийг авсан хүүхдүүдийг явуулах шаардлагатай" гэсэн юм.