Мьянмарын ардчиллыг дэмжигч удирдагч Аун Сан Су Чиг шоронгоос гарган, тодорхойгүй байршилд гэрийн хорионд шилжүүлсэн гэж тус улсын хэвлэлд мэдээлжээ. Цэргийн засгийн газраас түүний хаана хорьж байгаа талаар өөр дэлгэрэнгүй мэдээлэл өгөөгүй байна. Төрийн мэдлийн хэвлэл мэдээллээр түүнийг цэргийн албаныхантай хамт сууж буй зургийг үзүүлсэн ч хэзээ, хаана авсныг тайлбарлаагүй байна.

Аун Сан Су Чи 2021 онд болсон цэргийн эргэлтээс хойш саатуулагдсан бөгөөд авлига болон бусад хэрэгт буруутгагдан ял авсан. Харин шүүмжлэгчид түүнийг шүүсэн явдал нь шударга бус гэж буруутгадаг.

Барууны орнууд болон НҮБ Аун Сан Су Чиг суллахыг уриалсаар ирсэн. Ялангуяа тэрбээр 80 нас хүрч байгаа тул эрүүл мэндийн байдалд нь санаа зовниж байна гэж удаа дараа мэдэгдсэн. Өнгөрсөн сард болсон сонгуулийн дараа цэргийн дэмжлэгтэй шинэ засгийн газар байгуулагдсан. Уг сонгуульд ардчиллыг дэмжигч нэр дэвшигчдийг оролцуулаагүй юм. Гэсэн хэдий ч уг сонгуулийг иргэний засаглалд шилжих алхам гэж цэргийн дэглэм мэдэгдсэн.

Аун Сан Су Чиг илүү дээр нөхцөлд шилжүүлснээр засгийн газар уян хатан бодлоготой гэдгээ үзүүлж байгаа мэт мессэжийг олон улсад өгөхийг зорьж байна гэж зарим ажиглагчид үзэж байна. Түүний хүү, Их Британид амьдардаг Ким Арис энэ талаар мэдэгдэл хийхдээ,  “Шоронгоос нууц байршилд шилжүүлсэн нь эрх чөлөө гэсэн үг биш” гэжээ. Мөн “Тэр одоо ч барьцаанд байгаа бөгөөд гадаад ертөнцөөс бүрэн тусгаарлагдаж, хууль бусаар хоригдож байна” гэж мэдэгдсэн байна.