Улаанбаатар хотын гудамжаар өнгө өнгийн скутер, цахилгаан мопед олширч, хөдөлгөөний шинэ хэв маяг бий болж байна. Энэ нь түгжрэлийг бууруулах, уян хатан зорчих боломжийг нэмэгдүүлэх давуу талтай ч нөгөө талдаа хотын соёл, иргэдийн эрхийг сорьж эхэллээ.

Өнөөдөр хамгийн их маргаан дагуулж буй асуудал бол явган хүний зам. Анх алхахад зориулагдсан энэ орон зайд скутер, мопедоор зорчих, зам дагуу эмх замбараагүй байрлуулах нь иргэдийн тайван, аюулгүй алхах эрхийг хязгаарлаж байна. Ахмад настан, хүүхэд, хөгжлийн бэрхшээлтэй иргэдийн хувьд энэ нь зүгээр нэг тав тухын асуудал биш харин бодит хүндрэл.

Замын хөдөлгөөний дүрэм тодорхой. Скутер, цахилгаан мопед нь явган хүний зам дээр биш, дугуйн зам болон автозамын баруун зах, хөвөөгөөр зорчих ёстой. Мөн зогсоолыг бусдад саад болохгүй, тодорхой байршилд зөв байрлуулах нь хэрэглэгч бүрийн үүрэг. Гэвч бодит байдал дээр энэ энгийн зарчим алдагдаж, хотын эмх цэгцэд сөргөөр нөлөөлж байна.

Энд зөвхөн хэрэглэгчийн биш, үйлчилгээ үзүүлэгчдийн хариуцлага ч яригдана. Скутер, цахилгаан мопед түрээсийн үйлчилгээ эрхлэгчид ашиг орлогоос гадна нийгмийн хариуцлагаа ухамсарлах цаг болсон. Тэд үйлчлүүлэгчдэд зориулалтын замаар зорчихыг аппликейшн болон заавраар тогтмол сануулах, явган хүний замд байршуулахыг хязгаарлах технологийн шийдэл (гео-хязгаарлалт гэх мэт) нэвтрүүлэх, тодорхой, зөв зогсоолын цэгүүдийг бий болгож, хэрэглээг эмх цэгцтэй болгох зэрэг бодит алхмуудыг хэрэгжүүлэх шаардлагатай.

Хот бол хамтын орон зай. Хэн нэгний тав тух нөгөөгийн эрхийг зөрчиж болохгүй. Скутер, мопед унаж буй хүн бүр, мөн энэ үйлчилгээг үзүүлж буй байгууллага бүр өөрсдийн үүргээ ухамсарлаж чадвал бид илүү соёлтой, аюулгүй, найрсаг хотод амьдрах боломжтой.

Явган хүний замыг чөлөөлж, мопед, скутер хэрэглэх соёлыг төлөвшүүлэх нь өнөөдрийн биш, маргаашийн хотын ирээдүй билээ.