Бэлгэвч үйлдвэрлэгч дэлхийн хамгийн том компаниудын нэг "Karex" Ираны дайнаас улбаалан бүтээгдэхүүний үнээ 30 хувь хүртэл нэмж магадгүй байдалд хүрчээ. Тус компанийн захирал Гох Миа Киат хэлэхдээ, мөргөлдөөн эхэлснээс хойш үйлдвэрлэлийн зардал ихээр нэмэгдсэн. Тиймээс энэ байдал үргэлжилбэл үнээ нэмж магадгүй гэж мэдэгдсэн байна. Малайз улсад байрладаг "Karex" жилд таван тэрбум гаруй бэлгэвч үйлдвэрлэдэг бөгөөд "Durex", "Trojan" зэрэг дэлхийн томоохон брэндүүд болон "NHS" зэрэг эрүүл мэндийн байгууллагуудад нийлүүлдэг.

Дайны улмаас дэлхийн нефтийн нийлүүлэлт тасалдаж, Иран, АНУ болон Израиль хоорондын хурцадмал байдал намжих шинжгүй байна. Ялангуяа Ормузын хоолойд тээвэрлэлт саатаж, олон улсын нийлүүлэлтийн сүлжээнд ихээхэн нөлөөлжээ. Дэлхийн газрын тос, шингэрүүлсэн хийн ойролцоогоор 20 хувь нь энэ хоолойгоор дамждаг. "Karex" компани бэлгэвч үйлдвэрлэхэд шаардлагатай аммиак болон силикон зэрэг нефтийн гаралтай түүхий эдээс хамааралтай. Тиймээс нефтийн нийлүүлэлт тасалдахад эдгээр материалын үнэ өссөн байна.

Үүний зэрэгцээ энэ жил бэлгэвчийн эрэлт ойролцоогоор 30 хувиар нэмэгдсэн байна.

Мөн тээврийн зардал өсч, хүргэлт удааширснаар хомсдол улам нэмэгджээ. Гох Миа Киат хэлэхдээ, хүмүүс ирээдүйдээ эргэлзэж байгаа үед бэлгэвч хэрэглэх нь нэмэгддэг, учир нь хүүхэдтэй болох нь илүү их зардал дагуулна гэжээ.

Бэлгэвчийн үнэ өсч байгаа нь дэлхийн мөргөлдөөнүүд энгийн хэрэглээний бараанд хүртэл нөлөөлж байгааг харуулж байна. АНУ-ын ерөнхийлөгч Дональд Трамп гал зогсоох хэлэлцээг сунгаж, хэлэлцээ үргэлжилж байгаа гэж мэдэгдсэн. Гэсэн хэдий ч АНУ болон Ираны харилцаа тодорхойгүй хэвээр байна.