Ираны далбаатай ачааны хөлгийг саатуулсан гэж АНУ-ын ерөнхийлөгч Дональд Трамп мэдэгдсэний дараа дэлхийн нефтийн үнэ огцом өслөө. Мөн Иран дэлхийн хамгийн чухал эрчим хүчний тээврийн замуудын нэг болох Ормузын хоолойг хаасантай холбоотой.

Дэлхийн газрын тосны үнийн жишиг үнэ 5.4 хувиар өсч, баррель нь 95.27 ам.доллар болсон бол АНУ-ын жишиг үнэ 5.9 хувиар өсч, 88.79 ам.доллар болжээ.

АНУ болон Израиль хамтарч Иранд цохилт өгсний дараа дэлхийн нефтийн үнэ огцом өссөн. Мөн Иран улс Ормузын хоолойг хаах бүрт дэлхийн эрчим хүчний нийлүүлэлт тасалдаж, нефтийн үнэ байнга савлаж байна. Саяхан Иран улс тус хоолойг нээнэ гэж мэдэгдэж байсан ч зах зээлийн үнэ буурсны дараа дахин хаажээ. Тус улсын хувьд АНУ тэнгисийн хориг арга хэмжээгээ зогсоох хүртэл нээхгүй гэж мэдэгджээ. Гэвч Вашингтоноос тохиролцоо хийх хүртэл хоригийг үргэлжлүүлнэ гэж хариу мэдэгдэж байна.

Шинжээчдийн үзэж буйгаар нефтийн зах зээл бодит нөхцөл байдлаас илүү улс төрийн мэдэгдэлд хариу үзүүлдэг болсон.

Энэ нөхцөл байдал дэлхий даяар, ялангуяа Азийн орнуудад хүчтэй нөлөөлж байна. Зарим улс эрчим хүчээ хэмнэхийн тулд ажлын цагийг багасгах, агааржуулагч бага ашиглахыг уриалж, шатахууны үнийг хязгаарлах зэрэг арга хэмжээ авчээ. Агаарын тээврийн компаниуд шатахууны үнэ өссөнөөс хүндрэлд орж байгаа бөгөөд хэрэв нийлүүлэлт хэвийн болохгүй бол нислэгүүд цуцлагдах эрсдэлтэй байна.