Олон улсын математикийн хамгийн чухал тэмцээнүүдийн нэг болох IMC (International Mathematics Competition)-г анх удаа Монгол Улсад зохион байгуулахаар бэлтгэл ажлаа эхлүүлээд байна. Энэхүү 26 дахь удаагийн IMC олимпиад долдугаар сарын 22–27-ны өдрүүдэд Налайх дүүрэгт байрлах GMIT-ийн кампуст зохион байгуулагдах юм. Монгол Улс 2010 оноос хойш тус олимпиадад тогтмол, амжилттай оролцсоор ирсэн бөгөөд Вьетнам улсад болсон 25 дахь удаагийн тэмцээнээс цом хүртсэнээр 2026 онд эх орондоо зохион байгуулах эрхийг авсан юм.

Энэхүү олимпиад нь ангилал бүрд улсаа төлөөлж нийт 16 сурагч оролцдог бөгөөд энэ жилийн хувьд эх орондоо зохиож буй онцгой нөхцөлийн дагуу 80 сурагч оролцуулах болсон таатай мэдээтэйгээр бэлтгэл хангаж байна.

Дэлхийд математикийн боловсролоор тэргүүлэгч 40 гаруй орны шилдэг сурагчид оролцож, бага анги, дунд анги гэсэн ангиллаар хувь болон багийн төрлөөр өрсөлдөх юм. Нөгөөтэйгүүр, сурагчдын логик сэтгэлгээ, асуудал шийдвэрлэх чадвар, математик хэрэглээний ур чадварыг хөгжүүлэхэд чиглэдэг. Сонгон шалгаруулалтын үйл явц Үндэсний шигшээ багийг бүрдүүлэх зорилгоор Улсын анхдугаар бага, дунд шатны математикийн олимпиадыг үе шаттайгаар зохион байгуулж байгаа бөгөөд эхний шат 2026 оны нэгдүгээр сарын 31-нд улс орон даяар явагдсан.

Харин удаах шат буюу улсын аварга шалгаруулах анхдугаар тэмцээн 2026 оны дөрөвдүгээр сарын 18-19-ний өдрүүдэд “Хүлэг Интернэшнл” дунд сургуульд зохион байгуулагдлаа.

Сонгон шалгаруулалтад нийт 21 аймаг болон Улаанбаатар хотын 60 гаруй сургуулийн 750 орчим сурагч улсын аваргын төлөө өрсөлдөхөөр эхний шатнаас шалгаран оролцсон нь энэ юм. Мөн тус математикийн олимпиадад 6 дугаар ангийн 40 сурагч, 9 дүгээр ангийн 40 сурагч тус тус шалгарч ирэх долдугаар сард зохион байгуулагдах олон улсын IMC олимпиадад Монгол Улсаа төлөөлөн оролцох эрхтэй болж медалиа гардан авлаа. Энэхүү арга хэмжээ нь Монгол сурагчдын олон улсын түвшинд өрсөлдөх чадварыг нэмэгдүүлэх, шилдэг ирээдүйтэй математикчдыг дэмжих, боловсролын салбарт олон улсын хамтын ажиллагааг өргөжүүлэх чухал алхам болно гэж зохион байгуулагчид үзэж байна.