Нийслэлийн хэмжээнд скүүтер, мопедын замбараагүй хэрэглээнээс үүдсэн осол эндэгдлийг бууруулах, замын хөдөлгөөний аюулгүй байдлыг хангах зорилгоор шат дараатай ажлуудыг хэрэгжүүлж байна. Энэ хүрээнд НИТХ-ын дарга бөгөөд Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлийн дарга А.Баяраар ахлуулсан ажлын хэсэг хуралдаж, хяналт шалгалтыг эрчимжүүлэх шийдвэр гаргалаа. Тодруулбал, Бага тойруугийн хэмжээнд нийт 86 байршилд 185 албан хаагч хяналт тавьж ажиллахаар болов. Хяналтыг нэг цагдаагийн албан хаагч, нэг олон нийтийн цагдаа гэсэн бүрэлдэхүүнтэйгээр гүйцэтгэх бөгөөд олон нийтийн цагдаа нарыг тусгай сургалтад хамруулж байна.

Нийслэлийн Засаг даргын 2026 оны А/387 дугаар захирамжийн дагуу Бага тойруу дотор дугуйн замын тэмдэглэгээгүй хэсэгт скүүтер, мопедтой явган хүний замаар зорчихгүй. Харин авто замын баруун талын хөвөөгөөр зорчино. Мөн тээврийн хэрэгслийн жолооч автозамын баруун хөвөөг чөлөөлж, скүүтер, мопедтой зорчигчдод хүндэтгэлтэй хандах үүрэгтэй аж.

Үүнээс гадна тэмдэглэгээ бүхий дугуйн замаар явж байгаа тохиолдолд явган зорчигч зам тавьж өгөх бөгөөд дугуйн замаар явган хүн зорчихгүй байхыг тусгаж өгсөн байна.

Скүүтер, мопедыг явган хүний замаас буулгах ажлыг үе шаттай хэрэгжүүлж байна. Өнгөрсөн намраас л 16 нас хүрээгүй бол унах боломжгүй тохиргоо хийхийг аж ахуй нэгжүүдэд анхааруулсан. Гэтэл одоо ч 11 настай хүүхэд мопед унаад осол гаргаж байна. Азаар хүүхэд бэртээгүй. Гэвч хүний амь наснаас илүү бизнес гэж байх ёсгүй. Хаа хаанаа хариуцлагатай баймаар байна гэж НИТХ-ын дарга А.Баяр онцлов.

Иргэд, жолооч та бүхнийг замын хөдөлгөөний дүрмээ чанд мөрдөж, бусдын аюулгүй байдалд хүндэтгэлтэй хандахыг Нийслэлийн ЗДТГ-аас уриалж байна.