Serie A-гийн долоо хоногийн онцлох тоглолт: Napoli vs Lazio — амбицын шалгуур

Наполи баг 2024 оны арванхоёрдугаар сараас хойш талбайдаа лигийн тоглолтод ялагдаагүй явна. Тэд өнөөдөр/2026.04.18/ шөнө 00:00 цагаас 33-р тойргийн хүрээнд Лациог хүлээн авна. Ромын баг Наполиг гэрт нь хожсон сүүлийн баг гэдгээрээ анхаарал татаж байна.

Аваргуудын лигийн эрхийн төлөө Наполи тэмцсээр

Энэ тоглолтод ялалт байгуулах нь талбайн эздэд Аваргуудын лигийн эрхээ бататгах боломж. AC Mиланы алдаа, мөн Наполигийн хоорондын тоглолтын ялалтын дараа “Партенопейчууд” 32 тоглолтоос 66 оноотойгоор хүснэгтийн 2-р байрт бичигдэж байна. Антонио Контегийн баг Миланаас 3 оноогоор, 4-р байрт яваа Ювентусээс 6 оноогоор илүү явж байна. 5-р байрт бичигдэж буй Комо аваргуудаас 8 оноогоор хоцорч байна.

Сүүлийн тойрогт Парматай тэнцэхээс өмнө Наполи дараалан 5 ялалт байгуулсан. Улирлын хоёрдугаар хагаст тэд 26 оноо авсан нь хүснэгтийг тэргүүлэгч Интер Миланаас ердөө 1 оноогоор дутуу үзүүлэлт юм. Кристиан Чивугийн багийг гүйцэх бараг боломжгүй ч Наполи одоогийн формоороо 2-р байрны гол өрсөлдөгч харагдаж байна.

Гэхдээ бүрэлдэхүүний асуудал бий. Гэмтлийн улмаас Амир Рахмани, Жованни ди Лоренцо, Давид Нереш, Антонио Вергара, Ромелу Лукаку нар тоглохгүй. Гэсэн ч энэ улиралд Наполид олон санаачлагатай бий. Тус багаас лигт нийт 19 өөр тоглогч гоол оруулсан нь хамгийн өндөр үзүүлэлт.

Лацио боломжоо ашиглах хэрэгтэй

Ромын баг хүснэгтийн дунд хэсэгт 44 оноотой, 9-р байрт явж байна. Европын тэмцээний бүсээс зай их тул Маурицио Сарригийн баг Италийн цомд илүү төвлөрөх төлөвтэй. Тэд ирэх долоо хоногт Aталантатай хагас шигшээ тоглолтын хариу тоглолт хийнэ. Гэсэн ч энэ нь Серие А-д стандарт бууруулах шалтгаан биш. Аваргуудын эсрэг тоглолт багийн сэтгэлзүй, ур чадварыг шалгах чухал сорилт юм.

Сүүлийн тоглолтод Фиорентинад 0:1-ээр хожигдсон нь тэдний 4 тоглолт дараалан ялагдаагүй цувралыг зогсоосон. Энэ хугацаанд Лацио Сассуоло (2:1), Милан (1:0), Болонья (2:0)-г хожиж, Парматай (1:1) тэнцсэн. Тэдний хамгаалалт онцгой. Лигт 14 “clean sheet” авсан нь зөвхөн Комо, Интероос бага үзүүлэлт юм.

Лациод ч мөн адил гэмтэл бэртэл байна. Адам Мурисич булчингийн гэмтэл авсан бол Даниел Малдини өвдөгний шөрмөсний асуудалтай. Мөн Иван Проведел, Николо Ровелла, Самуэль Гигот, Марио Жила нар тоглохгүй.

Түүх харвал Наполид амаргүй

Нэгдүгээр сард Наполи Ромд Лациог Спинацолла болон Рахманигийн гоолоор 2:0-ээр хожсон. Тэд 65.3% бөмбөг эзэмшиж, 14 цохилт хийсэн бол өрсөлдөгчдөө 5 цохилтод барьсан.

Гэхдээ өмнөх түүхийг харвал энэ удаа амар тоглолт болохгүй. Тэр ялалтаас өмнө Наполи 2022 оноос хойш 6 дараалан тоглолтод Лациог хожиж чадаагүй. Ромын баг тоглолтыг хатуу, барьцалдаантай болгох чадвартай.

“Партенопейчууд” энэ тоглолтод фаворит харагдаж байгаа ч “Бүргэдүүд” нууц хөзрүүдтэй. Хэн ялна гэж бодож байна?