PGL Bucharest 2026 тэмцээн эхлэхийн өмнө The MongolZ болон PARIVISION багуудыг гол фаворитууд гэж үзэж байсан. Гэвч PARIVISION плейоффын эхний шатанд шууд хасагдсан бол Монголын баг хагас шигшээд хүрч, хүрэл медаль хүртсэн юм. Тэгвэл тэмцээн хэрхэн өрнөж, яаж битүү морь FUT Esports аварга болж чадсан бэ?

Хэсгийн шат

The MongolZ баг тэмцээнийг BC.Game Esports-ийн эсрэг гайхалтай тоглолтоор эхлүүлсэн. Тус багт домогт AWP тоглогч "s1mple"карьераа дахин сэргээхийг зорьж тоглож байлаа.

Зарим үед s1mple өндөр түвшнээ харуулж, багийнхаа шилдэг тоглогч болж (1.26 рейтинг), сайн тоглосон ч The MongolZ илт давуу байж, Dust2 дээр 13:3, Ancient дээр 13:11-ээр ялалт байгуулсан. Сонирхолтой нь тэд 12:6-аас 12:11 хүртэл оноо алдах шахсан ч илүү цаг гаргалгүй ялалтаа баталгаажуулсан.

Хоёр дахь тоглолтод The MongolZ Шведийн EYEBALLERS багтай таарсан. Overpass, Mirage хоёр газрын эхний үе 6:6-аар тэнцүү өрнөсөн ч хоёрдугаар хагаст манай баг илт давуу байж, дараалан 7:1-ээр хааж, хоёр газрын аль алинд нь 13:7-оор ялсан.

Гурав дахь тоглолтод плейоффт шалгарах боломж байсан ч нэгэн цагийн домог Astralis Бухарестэд сэргэж чадсан. Mirage дээр 13:4-өөр илт давуу ялсан бол Ancient дээр The MongolZ 8:2-оор тэргүүлж байгаад 9:13-аар ялагдаж, нийт тоглолтод хожигдсон.

Дөрөв дэх тоглолтод The MongolZ Wildcard багийг 13:11 (Dust2), 13:8 (Nuke)-аар хожиж, плейоффын эрхээ баталгаажуулсан.

Astralis болон FUT Esports багууд 3:0 амжилтаар плейоффт шалгарсан бол The MongolZ, MIBR, 3DMAX багууд тус бүр нэг хожигдолтой байсан. Харин PARIVISION сүүлчийн шатанд Wildcard-тай шийдвэрлэх тоглолт хийж, CS2 түүхэн дэх хамгийн урт Mirage газрын нэгийг (5 overtime, 28:26) бүтээсэн.

Плейофф

Плейоффын эхний шатанд гол фаворитууд болох The MongolZ болон PARIVISION таарсан. ‘Jame’ тэргүүтэй баг Dust2 дээр 13:6-аар ялсан ч The MongolZ Mirage дээр 13:8-аар хариу барьсан.

Шийдвэрлэх Ancient газрын эхлэл The MongolZ-д тун хүнд байсан — PARIVISION 9:3-аар тэргүүлж байлаа. Гэвч довтлогч талаас манай баг 10 дараалсан раунд авч, гайхалтай эргэн ирэлт хийж 13:9-өөр ялалт байгуулсан.

Хагас шигшээд The MongolZ битүү морь FUT Esports-той тулсан. 2025 онд тус Турк баг Natus Vincere Junior бүрэлдэхүүнийг дасгалжуулагч coolio-гийн хамт худалдан авсан нь үр дүнгээ өгч байлаа.

Тоглолт тун тэнцүүхэн өрнөсөн ч шийдвэрлэх мөчүүдэд FUT илүү байв. Nuke дээр 13:10-аар ялж, Mirage дээр The MongolZ 4:8-аас эргэн ирж overtime хүргэсэн ч 14:16-аар ялагдсан. 910 болон cobrazera сайн тоглосон ч mzinho, Techno нарын форм сул байлаа.

Тайвшрах шалтгаан нь FUT Esports эцэст нь аварга болсон. Харин The MongolZ хүрэл медалийн төлөө тоглолтод 3DMAX-ийг 13:5 (Inferno), 13:2 (Ancient)-оор бут ниргэжээ.

PGL Bucharest 2026 тэмцээн The MongolZ-ийн хувьд боломжийн амжилттай болж өнгөрлөө. Аварга авч чадаагүй ч багаараа сайн тоглов. Зүгээр л FUT Esports хагас шигшээд арай илүү азтай байсан гэлтэй. Ямартай ч Монголын баг ирэх Мэйжор тэмцээний өмнө үнэтэй туршлага хуримтлуулж, $150,000 шагнал хүртсэн юм.