Шинэ төмөр замын суурь бүтэц барих уралдаант шалгаруулалтын өмнөх зөвлөлдөх уулзалт яг одоо “Чингис” зочид буудалд болж байна. Зөвлөлдөх уулзалтыг Зам тээвэр, барилга, хот байгуулалтын яамнаас зохион байгуулж буй юм. Төмөр замын талаар төрөөс баримтлах бодлого батлагдсаны дээр энэ оны гуравдугаар сараас эхлэн хэрэгжсэн Концессийн хуулийн дагуу шинээр баригдах төмөр замын гүйцэтгэгчийг хэрхэн сонгон шалгаруулах талаарх танилцуулгыг дотоод гадаадынханд өглөө. Төрөөс төмөр замын тээврийн талаао баримтлах бодлогын эхний үе шат болох 1100 км орчим урттай хүнд даацын аж үйлдвэрийн зориулалттай төмөр замын суурь бүтэц барих гүйцэтгэгч компанийг сонгох олон улсын уралдаант шалгаруулалтын өмнөх энэ удаагийн уулзалтад олон улсын байгууллагууд болоод гадаадын улс орны Элчин сайдын яамдын төлөөлөгчид, хөрөнгө оруулагчид оролцож буй юм. Зөвлөлдөх уулзалт дээр ЗТБХБ-ын дэд сайд Л.Гансүхийн танилцуулснаар Монгол Улсын ирээдүйн  хөгжлийн үе шатыг 2007-2015 он, 2016-2020 он гэсэн үндсэн хоёр хэсэгт хуваан үзэж байгаа юм байна. Энэ хугацаанд манай улсын эдийн засаг 14-15 хувиар өсч, ДНБ-ний хэмжээ Малайз, Индонез, Тайванийн төвшинд очих боломжтой гэсэн таамгийг мэргэжлийн байгууллагууд дэвшүүлжээ. Ийн үсрэнгүй хөгжилд хүрэхэд төмөр зам тун чухал ач холбогдолтой нь ойлгомжтой. Тиймээс шинээр баригдах төмөр замын сонгон шалгаруулалтыг ойрын хугацаанд хийх ажээ. Олон улсын сонгон шалгаруулалтыг хэзээнээс хэрхэн явуулах  талаар Зам тээвэр барилга хот байгуулалтын сайд Х.Баттулгаас тодруулахад:
-Төмөр замын тендер гэдэг бол дэлгүүр ажиллуулах, талх зарах тендертэй зүйрлэшгүй их хэмжээний хөрөнгө мөнгө шаарддагаараа, дэлхий дээр цөөн хэдхэн байгууллага гүйцэтгэдгээрээ онцлог. Саяхан манай улс Концессийн хуулиа баталлаа. Энэхүү хуулийн дагуу ВОТ,ВТ гэсэн хоёр нөхцөлийн аль нэгээр сонгон шалгаруулалт зарлагдана. ВОТ гэдэг нь гүйцэтгэгч мөнгө гаргаж төмөр зам байгуулаад тодорхой хугацаанд ашигласныхаа дараа төрд хүлээлгэн өгөх хэлбэр юм. Харин ВТ нь барьж байгуулмагцаа төрөөс зардлаа аван хүлээлгэн өгөх хэлбэр юм. Манай улсын хувьд ВОТ хэлбэр нь илүү тохиромжтой гэж үзэж байгаа. Тендерийг яг төдийд эхэлнэ гэж хэлэхэд эрт байна.
-Сонгон шалгаруулалтыг ямар улс илүү сонирхож байна вэ?
-Хөрш орнуудын сонирхол өндөр байна. Солонгос, Японд ч мөн сонирхол байгаа. Сонирхсон улс орны уулзалтуудыг хийж байна. Сонирхогчдыг консерциум болон оролцох болов уу гэсэн  таамаг ч бий  гэлээ.
Шинээр тавигдах төмөр зам нь говийн бүс нутагт тавигдах учраас хөрс, ус, замын судалгааг нарийвчлан хийж эхэлжээ. Тэгэхээр сонгон шалгаруулалтын эхлэл хэдийнэ тавигдсан гэж сайд онцолж байлаа. Эхний удаа тавих 1100 км төмөр зам нь Даланзадгадаас Тавантолгой хүртэлх 450 км, Цагаан суваргаас Зүүнбаян хүртэлх 400 км,Сайншандаас Баруун-Уотын чиглэлд 350 км, Баруун-Уотаас Хөөт хүртэлх 140 км, Хөөтөөс Чойбалсан хүртэлх 160 км зам байх ажээ. Энэхүү томоохон бүтээн байгуулалтыг 2,5 жилд багтаан гүйцэтгэхийг санал болгож байгаа бөгөөд цаад талын хугацааг дөрвөн жилээс хэтрүүлэхгүй юм байна. Харин дараагийн 900 км төмөр замыг 2012 оноос тавьж эхлэхээр төлөвлөжээ. Шинээр тавих төмөр замын цариг нь 1520 мм буюу өргөн цариг байх юм.