4/11  Ардчилсан намын мэдээллийн цагаар өнөөдөр /2026.04.16/ дараах мэдээллийг өгч, байр сууриа илэрхийллээ.

Ардчилсан намын ЕНБД-ын үүрэг гүйцэтгэгч С.Баярцогт:

-Бид намын доторх зохион байгуулалтын асуудлаа бүрэн хийж дууссаны дараа бүлгийн даргын асуудлаа шийдвэрлэнэ. Тавдугаар сарын 15-ны дотор хуралдах ҮБХ-оороо Ерөнхий нарийн бичгийн даргыг томилж, эцэслэх шаардлагатай. Зохион байгуулалтын хувьд иймэрхүү шийдвэрлэх асуудлууд үлдээд байна.

Манай Хяналтын ерөнхий хороо байгуулагдсан бөгөөд дотроо гурван дэд хороотой. Эдгээрийг зохион байгуулж, өнөөдөр хуралдан дэд хороодын дарга нарыг сонгоно. Хяналтын ерөнхий хороо нь манай намын Үндсэн хуулийн Цэц, Улсын дээд шүүх, мөн сонгуулийн үйл ажиллагааг хариуцсан гурвалсан чиг үүрэгтэй байгууллага юм.

УИХ-ын гишүүнийг эгүүлэн татах хуулийн төслийн тухайд өчигдөр манай намын Улс төрийн зөвлөл дээр гурван гишүүн мэдээлэл хийсэн. Манай нам их нээлттэй нам. Улс төрийн зөвлөлийн бүх гишүүд байр суурийг нь сонссон, мөн хөндлөнгийн судалгааны системийн үр дүнд суурилан Улс төрийн зөвлөл "өргөн барьсан хуульд зохицуулах шаардлагатай асуудал байна. Авлига, албан тушаалын хэрэгтэй холбогдоод УИХ-ын гишүүнийхээ тангаргийг ноцтой зөрчсөн хүмүүст хариуцлага тооцох механизм дутагдалтай байна" гэдгийг ярилцсан. Үүнийг одоо байгаагаар нь бүрэн дэмжвэл Засаглалын тэнцвэр алдагдах хүндрэл гарч магадгүй.

Манай бүлэг олонхоороо эсэргүүцсэн шийдвэр гаргасан. Гэхдээ бүлэг асуудлыг хоёр одтой, гурван одтой гэж эрэмбэлдэг. Өөрөөр хэлбэл, гурван одтой шийдвэрийг гишүүд өөрийнхөө үзэл бодлоос үл хамаарч дагах шийдвэр гаргадаг. Хоёр одтой шийдвэр дээр бүлгийн шийдвэр гардаг гэсэн ч цөөнх болсон нь өөрийнхөөрөө УИХ-дээр байр сууриа илэрхийлэх эрх нь нээлттэй байдаг. Даваа гаригийн бүлгийн хуралдаанаар хоёр одтой шийдвэр гаргасан.

Миний хувьд хэлэлцэх эсэхийг нь дэмжих хэрэгтэй, үүний дараа парламентын бүх намын төлөөлөл багтсан ажлын хэсэг гарч хуулийн үр дагавруудыг тооцох хэрэгтэй. Нээлттэй ярилцах хэрэгтэй. Магадгүй энэ парламент дээр хэрэгжихгүй байж болно. Ирэх парламентад хэрэгжүүлэх боломжтой" гэлээ.