Олон улсын валютын сангийн захирал Кристалина Георгиева Ням гаригт /2026.04.12/ өгсөн ярилцлагадаа Ираны дайнаас улбаатай эдийн засгийн хямрал дэлхий дахинд, тэр дундаа эрчим хүчний импортоос хамааралтай орнуудад ихээхэн нөлөөлж байгааг онцолжээ.

Тэрбээр "CBS"-д өгсөн ярилцлагадаа "Энэ бол бүх дэлхийн хэрэг. Хүн бүр л эрчим хүч хэрэглэдэг. Бүгд үнийн өсөлтийн зах зухаас мэдэрнэ. Яг адил тэгш байхгүй ч гэлээ. Улс бүхэнд өөр өөрөөр нөлөөлнө. Хэрвээ танай улс мөргөлдөөнтэй ойрхон байгаа бол томоохон цохилт болно. Газрын тос импортлогч орон бол мөн л томоохон цохилт болно. Өөрсдийгөө хамгаалах нөөцгүй орон бол маш хүнд нөхцөл байдалд орно. Хөөрхий эмзэг улс орнууд. Ази байна уу, Сахарын цөлөөс урагш орших Африк байна уу хамаагүй хүнд цохилтод орж байна. Бид хариу арга хэмжээгээ хэлэлцэхдээ хамгийн эмзэг, эрсдэлтэй байгаа орнуудад онцгой анхаарлаа төвлөрүүлнэ" гэжээ.

Түүний онцолсноор нөлөөллийг хамгийн их мэдэрч байгаа орнууд бол Азийн импортлогчид аж.

АНУ-ын ерөнхийлөгч Дональд Трамп Ормузын хоолойг хаана, эрчим хүчний хангамжийг богино хугацаагаар ч хамаагүй хязгаарлана гэж заналхийлсний дараа Кристалина Георгиевагийн ярилцлага цацагдсан байна. Трамп мэдэгдэлдээ "Дэлхийн хамгийн агуу хүчин болох АНУ-ын Тэнгисийн цэргийнхэн яг одоо Ормузын хоолойгоор орох, гарах бүх хөлөг онгоцны хөдөлгөөнийг хязгааарлаж эхэллээ" гэсэн юм.