Боловсролын салбар дахь бодлого, шийдвэрүүд тодорхой бүлэгт давуу байдал бий болгосон гэх шүүмжлэл дагуулсаар ирсэн. Үүний тод жишээ хэмээн олон нийт Боловсролын зээлийн сангийн үйл ажиллагааг нэрлэх болсон нь учиртай. Анх гадаадад суралцах оюутнуудад санхүүгийн дэмжлэг үзүүлэх зорилготой хэрэгжиж эхэлсэн энэхүү бодлого нь бодит байдал дээр нийгмийн бүх давхаргад тэгш хүртээмжтэй байж чадсан уу гэсэн асуултыг дагуулж буй.

Тэгвэл төрийн аудитын байгууллагаас хийсэн хамгийн сүүлийн тайланг энгийнээр тайлбарлавал дараах дүр зураг гарч байна.

10.6 ТЭРБУМ ТӨГРӨГИЙН ЗӨРЧИЛ ИЛЭРЧЭЭ

Боловсролын зээлийн сангийн 2025 оны санхүүгийн тайлан, төсвийн гүйцэтгэлд хийсэн аудитын тайланд дурдсанаар нийт 10.6 тэрбум төгрөгийн зөрчил илэрчээ.

Хамгийн анхаарал татсан жишээнүүд:

• Гэрээгүй олгосон зээл
  2025-2026 оны хичээлийн жилд суралцах 258 оюутанд 9.3 тэрбум төгрөгийн санхүүжилт гэрээ байгуулахгүйгээр олгогдсон.
• Хариуцлагагүй зээлдэгчид
  7 суралцагч 1.1 тэрбум төгрөгийн зээл авсан ч гэрээний үүргээ биелүүлээгүй, эргэн төлөх хуваарь ч хийгдээгүй.
• Мартагдсан авлага
  Олон жил болсон 46.6 сая төгрөгийн авлагыг барагдуулах арга хэмжээ аваагүй.
• Дүрэм зөрчсөн худалдан авалт
  Төсвийг хувааж, 46.4 сая төгрөгийн худалдан авалтыг шууд хийсэн.

Эдгээр нь хууль, журамтай нийцээгүй төдийгүй санхүүгийн тайлангийн үнэн зөв байдалд сөргөөр нөлөөлөх эрсдэлтэй гэж аудит үзжээ.

ХЭДЭН ХҮНД, ХЭДЭН ТӨГРӨГ ОЛГОСОН БЭ?

Тайлант хугацаанд:

• Гадаадад суралцагчид
  1,648 оюутанд 67.7 тэрбум төгрөг
• Дотоодын оюутнууд
  16,807 суралцагчид 38.9 тэрбум төгрөгийн дэмжлэг олгогдсон байна.

ХАРИН ЭРГЭН ТӨЛӨЛТ ЯМАР БАЙНА?

• Дотоодын зээл:
  47,795 хүнээс 14.7 тэрбум төгрөг
• Гадаадын зээл:
  64 хүнээс 3.1 тэрбум төгрөг эргэн төлөгджээ.