Нэмэлт:

УИХ-ын гишүүн асан Б.Энх-Амгалан, Ерөнхийлөгчийн Тамгын газрын дарга асан З.Энхболд нарт холбогдох хэргийн шүүх хурал нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд болж байна. Шүүгдэгчдийн өмгөөлөгч гэрчээс мэдүүлэг авах үйл ажиллагааг шүүх хуралдааны үеэр зохион байгуулах шаардлагатай гэж үзэж байгаа талаар хэлэв. Мөн хуралдааны ирцтэй холбоотойгоор гэрчийн мэдүүлэгт дурдсан иргэн Ш.Батдэлгэрийг шүүх хуралдаанд гэрчээр оролцуулах хүсэлт гаргалаа. Түүнчлэн шүүх хуралдаан зохион байгуулах бэлтгэлийг удаа дараа хангаагүйн улмаас хойшлуулсан, шүүх бүрэлдэхүүн хэргээ хэрхэн хянаж үзсэн талаар асуудлыг хөндөх нь зүйтэй гэлээ. Тиймээс процессын ноцтой зөрчлөө арилгаж өгөхийг шүүх бүрэлдэхүүнээс хүсч байгаагаа илэрхийлсэн юм. Улмаар шүүх хуралдааныг түр завсарлуулав.

Завсарлагааны дараа шүүх бүрэлдэхүүн шүүгдэгчийн өмгөөлөгчөөс гаргасан хуралдааны ирцтэй холбоотой хүсэлтийг хүлээн авах боломжгүй гэлээ. Улмаар 10:00 цагт эхэлсэн шүүх хуралдаан дөрвөн цаг гаруй үргэлжилж, хуралдааныг маргааш буюу дөрөвдүгээр сарын 14-ний 09:30 цагт ахин товлолоо.

Б.ЭНХ-АМГАЛАН, З.ЭНХБОЛД НАРЫН ШҮҮХ ХУРАЛ БОЛНО

УИХ-ын гишүүн асан Б.Энх-Амгалан, Ерөнхийлөгчийн Тамгын газрын дарга асан З.Энхболд нарт холбогдох хэргийн анхан шатны шүүх хурал /2026.03.23/ болж, хурлыг өнөөдөр буюу дөрөвдүгээр сарын 13-ны 10:00 цаг хүртэл хойшлуулсан. Энэ хэргийг нийслэлийн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд хэлэлцэж байгаа бөгөөд өмнө нь тус хэрэг гурван өдрийн турш шүүхээр хэлэлцэгдсэн ч нэмэлт ажиллагаа хийлгэх шаардлагатай гэж үзэн шүүх хурлыг 60 хоногийн хугацаатай хойшлуулах шийдвэр гаргаж байсан юм.

Эргэн сануулахад, З.Энхболд болон Б.Энх-Амгалан нарыг албан тушаалын байдлаа урвуулан ашиглаж, бусдад давуу байдал бий болгоход хамтран оролцсон гэх үндэслэлээр буруутайд тооцож, нийтийн албанд томилогдох эрхийг таван жилийн хугацаагаар хасч, 40 сая төгрөгөөр торгох шийтгэл оногдуулж байв. Гэвч давж заалдах шатны шүүх уг шийтгэх тогтоолыг хүчингүй болгож, хэргийг дахин анхан шатны шүүхээр хэлэлцүүлэхээр шийдвэрлэсэн. Улмаар анхан шатны шүүх З.Энхболдыг цагаатгаж, харин Б.Энх-Амгаланд хоёр жилийн хорих ял оноосон байдаг.

Харин давж заалдах шатны шүүх дахин уг хэргийг хэлэлцээд анхан шатны шүүхийн шийдвэрийг хүчингүй болгож, дахин анхан шатны шүүхээр хэлэлцүүлэхээр шийдвэрлэснээр ийнхүү шүүх хурлыг дахин товлож, үргэлжилж байна.