Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүх цахим хэрэгсэл ашиглан олон иргэнийг залилж, их хэмжээний хохирол учруулсан хэргийг хянан шийдвэрлэлээ. Сүхбаатар дүүргийн прокурорын газраас шүүгдэгч Л.Эгшиглэнг “Севеникс виз консалтинг” ХХК-ийн гүйцэтгэх захирлаар ажиллаж байхдаа буюу 2021 оноос 2023 оны тавдугаар сар хүртэл хугацаанд 491 иргэнийг залилсан хэрэгт яллах дүгнэлт үйлдэн шүүхэд шилжүүлсэн байна.

Тэрбээр Австрали, АНУ, Канад, Шинэ Зеланд, БНСУ, Герман улс руу виз гаргаж өгнө, ажлын байранд зуучилна хэмээн иргэдийг хуурч, өөрийн болон компанийн дансаар нийт 3 тэрбум 603 сая 201 мянга 516 төгрөг шилжүүлэн авчээ.

Шүүх уг хэргийг 2026 оны гуравдугаар сарын 31-ний өдөр хэлэлцээд шүүгдэгч Л.Эгшиглэнг бусдыг залилан мэхэлж, гэмт хэргийг амьдралын эх үүсвэр болгосон гэм буруутайд тооцсон байна. Улмаар түүнд 10 жилийн хугацаагаар хорих ял оноож, 3 тэрбум 285 сая 303 мянга 458 төгрөгийг гаргуулж хохирогчдод олгуулахаар шийдвэрлэжээ. Энэхүү хэрэг нь удаан хугацаанд, олон хохирогчийг хамруулсан, зохион байгуулалттай байдлаар үйлдэгдсэн онц ноцтой залилангийн хэрэгт тооцогдож байна.