Монголд өнөөдөр хууль биш У.Хүрэлсүх засаглаж байна. Үндсэн хууль ч түүнд үйлчлэхгүй байна. Бас парламентын хууль. Парламентын гишүүд Ерөнхийлөгчийн "хэд"-эд загнуулж байна. Үүнийг ард түмний төлөөлөл УИХ-ын гишүүд хэлж байна.  Хуулийг буруугаар хэрэглэвэл маш олон зүйлийг алж болохтой адил мөн олон хүнийг аварч болдог. Хууль үүний тулд оршдог. Харин хэн нэгнийг яллахын тулд биш. Ерөнхийлөгч У.Хүрэлсүхийн УИХ-ын гишүүнтэй хариуцлага тооцох хууль энэ зарчмыг зөрчиж байгаа.

Ерөнхийлөгч У.Хүрэлсүхийн УИХ-ын гишүүдийг эгүүлэн татах хуулийн төслийг нэр бүхий хуульчид Үндсэн хуулийн Цэцэд өгсөн. Үндсэн хуулийн Цэцийн гишүүн О.Мөнхсайхан татгалзсан хариу өгсөн байна. Энэ үйлдэл нь Үндсэн хуулийн Цэцийн үнэн царайг илчиллээ. Үүгээрээ Үндсэн хуулийн шүүгч өөрөө Үндсэн хуулийн тухай хуулийн Гучин гуравдугаар зүйлийн 4 дэх хэсгээр “Ерөнхийлөгчид тодорхой бүрэн эрхийг зөвхөн энэ зүйлд заасан хүрээнд хуулиар олгож болно” гэх заалтыг үгүйсгэлээ.

Ерөнхийлөгч У.Хүрэлсүхийн хуулийн төсөл зургаан зүйлтэй бөгөөд Монгол Улсын Их Хурлын тухай хуулийн 7 дугаар зүйлд нэмэлт оруулах, 9 дүгээр зүйлийн холбогдох хэсэгт нэмэлт, өөрчлөлт оруулна. Үүгээрээ тэр дарангуйлах нь. Парламентын ардчилал, засаглал арчигдах нь.

Энэ талаар хэд хэдэн гишүүн хүчтэй дуугарч, дүгнэлтээ хэлсэн. Тухайлбал, МАН-аас сонгогдсон Х.Баасанжаргал гишүүн “Ардчилал нуран унаж байгааг бүгдээрээ хүлээн зөвшөөрцгөөе. Ямар нөхцөл байдалд байгаагаа бид одоо хүлээн зөвшөөрье. Яагаад дүр эсгээд байгаа юм бэ. Чимх чимхээр төрийн эрх мэдлийг булаан авч ардчиллыг сулруулдаг жишээг би мэднэ. Турк, ОХУ-ыг бид бүгд мэднэ” гэсэн бол УИХ-ын гишүүн Б.Жаргалан “Цаашид парламент орших уу, эс орших уу  гэдэг зангилаан дээр энэ хуулийн төслийг хэлэлцэж байна. Хүн бүр хийх ёстой ажлаа л хиймээр байна. Ерөнхийлөгч нь Ерөнхийлөгч шиг эв нэгдлийг хангадаг. Засгийн газар нь Засгийн газар шиг асуудлаа шийддэг. УИХ нь парламент шиг байж, ардчилсан тогтолцоог хамгаалж, хууль тогтоох эрх мэдлийнхээ хүрээнд иргэдийн аж амьдралд шаардлагатай хууль тогтоомжийг батлах. Гэтэл манайд хөлөөрөө толгой хийж байна гэдэг шиг л юм болж байна” хэмээн байр сууриа илэрхийлэв. Тэд бол хууль тогтоогчид бөгөөд эцсийн дүгнэлт өгөх эрх зүйн субъектууд юм.