УИХ дахь Ардчилсан намын бүлгийн гишүүд өнөөдөр /2026.04.09/ сэтгүүлчдэд мэдээлэл хийлээ. УИХ-ын чуулганы нэгдсэн хуралдаанаар өнөөдөр УИХ-ын тухай хуульд нэмэлт өөрчлөлт оруулах тухай төслийг хэлэлцэх үеэр Үндэсний аюулгүй байдлын зөвлөлийн нарийн бичгийн дарга А.Бямбажаргал "УИХ-ын гишүүн Б.Жаргалан нь МУИС-д суралцаж байхдаа хичээлдээ суудаггүй, дүн гуйж тавиулж байсан" гэх зүйлийг ярьсан юм. Тэгвэл эл асуудалд тэд дараах тайлбар хийв.

УИХ-ын гишүүн Б.Жаргалан:

-Энэ хуулийн төслийг Үндэсний аюулгүй байдлын зөвлөлийн нарийн бичгийн дарга танилцуулах эрх үүрэггүй гэдгийг хэлснийхээ төлөө гүтгэж доромжлууллаа.  Миний хувьд МУИС-ийн Хууль зүйн сургуулийг суралцаж төгссөн нь үнэн.  Гэхдээ би А.Бямбажаргал гэдэг нөхрийн ярьж байгаа шиг тийм үйл явдал болоогүй, би энэ хүнээс дүн гуйгаагүй. Цаашид ийм байдлаар гүтгэж доромжлох байдал газар авах юм бол парламент дахь эрх чөлөөт дуу хоолой үгүй болно гэдэг болгоомжлол байна. Үндэсний аюулгүй байдлын зөвлөлийн нарийн бичгийн дарга А.Бямбажаргал хариуцлага хүлээх ёстой.

УИХ-ын гишүүн Ч.Лодойсамбуу:

-Сая дэгийн зөрчил явсан, УИХ-ын дарга өөрөө буруутай. Б.Жаргалан гишүүн асуулт асуугаагүй байхад үг хэлүүлж байгаа. Дэгийн тухай хулиар асуусан асуултад хариулах тухай зохицуулалт байгаа. Асуулт асуугаагүй байхад А.Бямбажаргал үг хэлэхдээ парламентад хүндэтгэлтэй хандаагүй дээр гүтгэж байгаа.

Ёс зүй, ёс суртахууны асуудал ярьж байгаа энэ хуулийнхаа үзэл баримтлалын эсрэг авирыг үзүүлж байна. Цаашдаа ингэж явах юм байна.

Орж ирээд хэн нэг нь хөндлөнгөөс өргөдөл гаргаад ”Наад хүн чинь ингэж байсан шүү” гэж хэлээд энэ бол ёс зүйгүй үйлдэл шүү гээд Ёс зүйн хороогоо хуралдуулаад шийдвэр гаргуулаад гишүүн татдаг нөхцөл байдал руугаа шууд орж байна. Энийгээ өөрөө үйлдлээрээ үзүүллээ.

Парламентад эзэн суусан, үгэнд ор, үгүй бол гишүүнээ боль гэдэг хандлага харагдаж байна.

Монголын төрд нэг нам төрийн дээр гараад зогсчихсон нь ханшалттай харагдаж байгаа. Хотын дарга Х.Нямбаатар байна. Х.Нямбаатарыг дагасан бүх хүн Х.Нямбаатар болсон. Ерөнхийлөгчийг дагасан бүх хүн Ерөнхийлөгч болж хувирсан байна. Орж ирээд л шууд загнадаг хандлага газар авч байна. Тиймээс энэ хуулийг маш хатуу эсэргүүцэж байгаа.

Монголын парламентын гишүү ёс зүйтэй ажлаа сайн хийх ёстой нь үнэн. Нөгөө талдаа өөрсдийнхөө нөхцөл байдлаар дүгнээд цаашдаа 100, 1000 жил үргэлжлэх парламентын засаглалыг яг өнөөдрийн талцал хуваагдлаараа урж хаях эрх байхгүй.

А.Бямбажаргал хариуцлага хүлээх ёстой, Дэгийн хууль зөрчсөн УИХ-ын дарга С.Бямбацогт хариуцлага хүлээх ёстой.

Г.ХОРОЛ