Ч.Лодойсамбуу

УИХ-ын гишүүн

-Сүүлдээ Ардын намынхнаасаа гуйя даа. Та нар хоорондоо маргалдаж, тэмцэлдэж, санал зөрж, нэгнээсээ өс хонзон авч болно. Ах нь дүүгээ ороолгож болно. Гэхдээ Монголын төрийг битгий ашиглаад байгаач ээ. Парламентын ардчиллаа хайрлаач ээ. Ерөнхийлөгчийг бол ойлгож байна, сахилга хариуцлага байнга ярьдаг.  Гэхдээ хууль санаачлагчид нь төслийг боловсруулахдаа ингэж завааруулаад байдаг юм уу, эсхүл Монголд парламентын засаглал тохирохгүй гэж хэлээд байдаг юм уу. Ерөнхийлөгч УИХ-ын чуулганы танхимд орж ирээд “Би бол парламентынхаа ардчиллын төлөө байсаар байгаад явна аа” гэж хэлж байсан.

Одоо энэ залуучуудынх нь боловсруулсан хууль, хадгалж авч үлдэх гээд байгаа заалт нь Монголд парламентыг байхгүй болгох гэж байгаа, парламентын гишүүн гэдэг ойлголтыг байхгүй болгох гэж байгаа.

Урдуур нь ёс зүй гэдэг баг зүүлгэж байгаа. З.Нарантуяа-Нара гишүүний үг үйлдлээр бамбай хийж байгаа. Нара Нараагаараа л байна. Яг үнэндээ ИЗНН-д  саналаа өгсөн 8 хувийн сонгогчдын санал парламентад Наратай баймаар л байгаа шүү дээ. Тэдний буруу юм уу, ёс зүйгүй гэж хэлэх юм уу. Би бол ёс зүйгүй үйлдэл гэж хэлэхгүй. Энэ бол ёс суртахуунгүй үйлдэл. Ёс зүйгүй үйлдэл гэдэг хууль дүрэм дээр байхыг хэлнэ. Хэн нэгнийг гүтгэсэн бол Монгол Улс хуультай, шүүхэд өгөөд болоо. Гэтэл одоо тэрүүгээр далимдуулаад баахан хөөсрүүлж байгаад гишүүд болохоо болилоо, жаахан ташуурдъя, олон нийт алга ташаад,  шаардаад эхлэнгүүт сонгогчдоосоо айсандаа батлаад явна гэдэг ийм хөөрхөн төлөвлөгөө гаргасан юм шиг байгаа юм. Парламентад парламентын засаглалаа хайрладаг, өнөө маргаашаа боддог гишүүд олон байгаа. Бид ёс зүйтэй байж, хариуцсан ажлаа хийх ёстой, хуралдаа суух ёстой, саналаа ухамсартайгаар өгөх ёстой гэдэг асуудлаа УИХ- ын даргын дэргэдэх зөвлөл дээр ярьж байгаад УИХ -ын гишүүд нь өөрсдөө энэ асуудлыг өргөн барьчихъя.

Парламентыг цоолж өс хонзонгоо авах гэж байгаа санаархлыг зогсоох хэрэгтэй. Энэ төслийг татаж авах хэрэгтэй.

Надаар хэлүүлтгүй энэ хуульчид маш сайн мэдэж байгаа. Сөрөг үр дагаварыг нь асуухаар хариулахгүй байна шүү дээ. Яагаад хариулахгүй байна гэхээр мэдээд байгаа. Ард нь яг ийм асуудал үүснэ гэдгийг мэдээд байгаа байхгүй юу. Гэхдээ тэр нь хамаагүй гээд байгаа. Өнөөдөртөө бид нар энэ танхимд байгаа хэдэн хүнийг байранд нь аваачиж тавъя гэдэг өш хонзонгийн сэдэл явж байгаа байхгүй юу. Энэ үйлдэлд нь хохирч үлдэх Монголын төр парламентын засаглал хайран байна.

 Д.Батлут

УИХ-ын гишүүн, Батлан хамгаалахын сайд

-Монгол Улсын Ерөнхийлөгчийн санаачилсан хуулийн төслийг дэмжиж байгаа. Монголчууд төр минь сайн сайхан байх болтугай гэж залбирдаг ард түмэн. Тэр утгаараа Монгол Улсын төр сайн сайхан зүйлээр дүүрэн байх ёстой, сайн хүмүүс ажилладаг байх ёстой гэж иргэд үздэг. Буруу хазгай харилцаа хандлага гаргахаас эхлээд хулгай зэлгий, авлигын хэрэгт холбогдох асуудал гаргахгүй байх ёстой. Тэр утгаараа энэ хууль батлагдсанаар олон зүйлээс урьдчилан сэргийлэх боломжийг гишүүдэд олгоно. Гишүүдийг хамгаалсан хууль болно гэж харж байна.

Манайхан янз янзаар мушгиж тайлбарлаад байгаа. Парламентын дархлааг алдагдуулах гээд байна гэж,  үгүй  шүү.

Харин ч парламентыг илүү дархлаатай байх боломжийг бүрдүүлж өгч байгаа.

УИХ-ын гишүүд янз бүрийн асуудалд орооцолдох юм бол ийм хариуцлага байдаг юм шүү гэдгийг ойлгуулж өгч байгаа зүйл гэж харж байгаа. Яг үнэндээ УИХ -ын гишүүн бүрэн эрхтэй гээд бүрэн эрхийнхээ ард нуугдсан байдлаар асуудалд ханддаг. Аливаа зүйл дээр хаалттай байдаг, аливаа зүйлийг өөрийнхөөрөө шийддэг гэдэг ч юм уу янз бүрийн хэл ам зөндөө л гарч байна. Энэ бүхэнд цэг тавьсан,Үндсэн хуульд заасан тодорхой залатыг амилуулсан хуулийн төсөл болсон гэж харж байгаа.