Монгол Улсын 35 дахь Ерөнхий сайдаар Монгол ардын намын дарга Н.Учрал томилогдоод 10 хоногтойгоо золгож байна. Шинэ Ерөнхий сайдын анхны шийдвэрүүд эхнээсээ гарч, дансаа хаалгасан олон аж ахуй нэгжийн дансыг нээж буйгаа зарлав.

Ингэхдээ татварын өртэй 12 100, нийгмийн даатгалын шимтгэлийн өртэй 6042 аж ахуй нэгжийн дансыг нээж, эдгээр аж ахуй нэгжүүдэд графикийн дагуу өр төлбөрөө төлөх НЭГ сарын хугацаа өгөв.

Татварын ерөнхий газар, Нийгмийн даатгалын ерөнхий газрууд татварын өрөө төлж чадахгүй, нийгмийн даатгалын өрөө төлж чадахгүй байгаа аж ахуй нэгжүүдийн дансыг хаасан. Өөрөөр хэлбэл, Н.Учралын өмнөх Г.Занданшатарын Засгийн газрын үед хаасан гэсэн үг. Харин  ажлаа аваад 10 хонож байгаа шинэ Ерөнхий сайд Н.Учрал байгууллагуудын дансыг нээж буйгаа зарлаж, сүр дуулиантай рийл, постер хийж, шоудав.

Угтаа бол МАН-ынхан хааж, МАН-ынхан нээж буй л процесс.

Мэдээж шинэ Засгийн газар эдийн засаг хүнд хэцүү цаг үед аж ахуй нэгжүүдээ дэмжих бодлого нь ЗӨВ. Гэхдээ Н.Учралын олгосон нэг сарын хугацаа бол амьдралд нийцэхгүй, хөрсөн дээр буух боломжгүй шийдвэр юм. Энэ бол аргацаасан шийдвэр гэдгийг МАН-ынхан, шинэ Засгийн газрынхан, татвар, нийгмийн даатгалынхан ч сайн мэдэж л байгаа асуудал.

Учрыг нь тайлбарлаад өгье, Ерөнхий сайд аа,

Нэгт, эдгээр аж ахуй нэгжүүд нийгмийн даатгалын шимтгэл, татвараа төлөх эдийн засгийн хувьд боломжтой байсан бол татвараа цаг тухайд нь төлөөд явах байсан. Угаасаа төлөх ёстой, түүнийгээ ч аж ахуй нэгжүүд ойлгож, ухамсарлаж байгаа. Гол нь аж ахуй нэгжүүдийн орлого буурсан, иргэдийн худалдан авах чадвар муудсан, бараа, үйлчилгээний борлуулалт буурсан учраас өрөнд баригдчихаад байгаа юм. Харин ч өнөөдрийг хүртэл аж ахуй нэгжүүд ажилчдынхаа цалинг тасалдуулахгүйн тулд цалингаа олгож, татвар, нийгмийн даатгалын өрөө бага ч болов төлөөд яваад л байгаа. Мэдээж үйл ажиллагаа эрхэлж л байгаа бол татвараа албаар төлөхгүй, татвараас зайлсхийх аж ахуй нэгж нэг ч байхгүй.

Ялангуяа нийгмийн даатгалын шимтгэл бол ажилтан, ажил олгогч хоёрын хувьд зайлшгүй төлөх ёстой ӨР. Урт удаан хугацаанд хуримтлагдаад ирсэн өрийг таны өгсөн НЭГ сарын хугацаанд төлж барагдуулах аж ахуй нэгж хуруу дарам цөөхөн байгаа шүү, бодит байдал дээр.

Хоёрт, мэдээж өнгөрсөн хугацаанд танай нам засаг барьж байх хугацаанд аж ахуй нэгжүүдийн орлого тасарч, эдийн засгийн өсөлт бодит хөрсөн дээр буугаагүй, нөхцөл байдал иймд хүрсэн гэсэн үг. Өөрөөр хэлбэл, бүх чиглэлд аж ахуй нэгжүүд чинь өндөр татварын татаасанд тань сөхөрч унасны л илрэл нь нийгмийн даатгал, татварын өр юм.

Угтаа бол төр аж ахуй нэгжүүдийнхээ орлогыг нэмэгдүүлэх, татварын уян хатан бодлого хэрэгжүүлж иргэдээ ажилтай орлоготой байхад анхаарч ажиллах учиртай.

Гэвч өнгөрсөн хугацаанд иргэдээ ажилтай, орлоготой байлгахын тулд хамгийн их хичээсэн нь МАН-ын удирдаж буй төр биш 12 100 аж ахуй нэгж байсан юм шүү.

Тиймээс одоо шинэ Засгийн газар үнэхээр аж ахуй нэгжүүдээ дэмжих гэж байгаа бол татвараа бууруулах, нэгэнт өрөнд орсон аж ахуй нэгжүүддээ нэг сарын биш илүү урт хугацаа өгч, хуваарийн дагуу төлөлтөө хийлгэх, дансыг нь хаахгүйгээр үйл ажиллагааг нь үргэлжлүүлэх, нэг удаагийн Өршөөлийн хууль санаачлах гээд олон боломжууд төрд бий.

Нэгэнт л өртэй байгаа аж ахуй нэгжүүдэд тэнгэрээс өрөө дарах хэмжээний мөнгө унаад ирэхгүй л бол нэг сарын хугацаанд өрөө тэглэх боломжтой аж ахуй нэгж байхгүй л болов уу.

Нөгөө талдаа шатахууны үнэ нэмэгдсэн, түүнийг дагаад бүх л бараа, үйлчилгээний үнэ аль хэдийнэ нэмэгдээд, дэлхийн геополитикийн асуудал өнөөдөр Монголын ард иргэдэд мэдрэгдээд эхэлснийг танд дуулгая. Шинэ Засгийн газарт одоо зөв бодлого, зөв төлөвлөлт шуурхай ажиллах л хэрэгцээ нэн тэргүүнд тулгарч байгаа. Гэлээ гээд ийм бодит үнэнд нийцэхгүй, хөрсөн дээр бууж чадахгүй шийдвэрүүд гаргаад аж ахуй нэгжүүдээ, ард түмнээ шилний цаанаас чихэр долоолгох байдлаар явбал ээддээ олон аж ахуй нэгж хаалгаа барьж, ажилчдаа цөөлж, цалингаа нэмж чадахгүй үнийн хөөрөгдөлд чирэгдээд дуусах вий!