Авлигатай тэмцэх газрын Мөрдөн шалгах хэлтсээс Зам тээврийн яамны Төрийн нарийн бичгийн дарга Б.Насантогтоход холбогдох эрүүгийн хэргийн мөрдөн шалгах ажиллагааг дуусгаж, шүүхэд шилжүүлэх саналтай прокурорын байгууллагад хүргүүлэхээр шийдвэрлэжээ.

Б.Насантогтох нь Эрчим хүчний яамны Төрийн нарийн бичгийн даргаар ажиллаж байхдаа нэр бүхий аж ахуйн нэгжид техникийн нөхцөл олгохдоо холбогдох журмыг зөрчиж бусдад давуу байдал бий болгосон, албаны чиг үүргээ хэрэгжүүлсний хариуд нэр бүхий аж ахуйн нэгжүүдээс 281 сая төгрөгийн үнэлгээтэй орон сууц, 100 сая төгрөг, 30 мянган ам.долларын хахууль авсан, түүний хөрөнгө, орлого нь их хэмжээгээр буюу 3,4 тэрбум төгрөгийн үнэлгээтэй дөрвөн үл хөдлөх хөрөнгө, хоёр тээврийн хэрэгсэл болон 80 мянган ам.доллараар нэмэгдсэнийг хууль ёсны болохоо тайлбарлаж чадаагүй буюу үндэслэлгүйгээр хөрөнгөжсөн болох нь мөрдөн шалгах ажиллагааны явцад тогтоогдсон байна.

Мөрдөн шалгах ажиллагааны явцад 6,9 тэрбум төгрөгөөр үнэлэгдэх 17 үл хөдлөх хөрөнгө, 635,7 сая төгрөгийн үнэлгээтэй гурван тээврийн хэрэгслийг битүүмжлэн шилжилт хөдөлгөөнийг хязгаарласан бөгөөд уг хэрэгт долоон хүн, нэг хуулийн этгээдийг яллагдагчаар татан шалгаснаар гэмт хэргийн шинжтэй 10 үйлдэлд 3,7 тэрбум төгрөгийн үндэслэлгүй хөрөнгөжсөн үйлдлийг тогтоосон. Түүнчлэн 53 хүнээс гэрчийн мэдүүлэг авч, 47 баримтад үзлэг хийж, аж ахуйн нэгж, байгууллагуудаас 65 лавлагаа болон арилжааны банкнаас 35 дансны хуулга гаргуулан авсны зэрэгцээ санхүүгийн мөрдөгчийн магадлагаа хийлгэсэн байна.

Б.НАСАНТОГТОХ 208 САЯ ТӨГРӨГИЙН ХАДГАЛАМЖТАЙ, 237 САЯ ТӨГРӨГИЙН АВЛАГАТАЙ

Тэрбээр сүүлд 2024 онд АТГ-т хөрөнгө орлогоо мэдүүлжээ. Түүний жилийн нийт орлого нь 23 сая төгрөг байна. Тэгвэл гэр бүлийн нийт гишүүдийн орлого нь 219 сая төгрөг гэж мэдүүлсэн байна.

Түүний нэр дээр гурван нийтийн орон сууц, нэг үйлчилгээний зориулалттай барилга байгууламжтай, нэг авто гражтай гэж мэдүүлсэн бөгөөд нийт 793 сая төгрөгөөр үнэлсэн байна. Түүний хувьд туулах чадвар өндөр "Toyota Land Criuser 300" болон "Toyota Harrier" маркийн хоёр автомашинаа 333 сая төгрөгөөр үнэлсэн бол 120 хонь, 20 үхэр, хоёр хурдан удмын адуугаа 56 сая төгрөгөөр үнэлжээ. Мөн эзэмших эрхтэй дөрөв, өмчлөх эрхтэй нэг газраа нийтэд нь 309 сая төгрөгөөр үнэлсэн бол 42 сая төгрөгийн үнэт эдлэлтэй гэжээ.

Үүнээс гадна 208 сая төгрөгийн хадгаламжтай, 237 сая төгрөгийн авлагатай, 92 сая төгрөгийн зээлтэй гэж мэдүүлсэн байна. Тэрбээр "Ултимэйт технологи" ХХК, "Лаки Пи" компанид хөрөнгө оруулалт хийсэн байна.