Энэ сарын 25-нд тохиох Олон улсын залуучуудын өдрийг угтаж НИТХ-ын төлөөлөгч Д.Баярсайханы санаачлагаар “Оюунлаг залуус – Монголын ирээдүй” тэмцээнийг Сонгинохайрхан дүүргийн 10, 11, 28 дугаар хороодод зохион байгууллаа. Тэмцээнд тус дүүргийн 3 хорооны 46 багийн 230 гаруй залуучууд оролцож байна.

Тэмцээнээр дамжуулан улс орны хөгжлийн тулгуур багана болсон залуусын хөгжлийг дэмжих, тэдний хөгжилд хөрөнгө оруулалт хийж, нийгмийн хөгжлийн гарц, эх түүхийн мэдлэгийг дээшлүүлэх, өв соёлоо дээдлэх, түүхээр бахархах үзлийг төлөвшүүлэх ач холбогдолтой.

Тэмцээн оролцогчид XIII зууны үеийн Их Монгол Улсын түүх, 1911-1921 оны Богд хаант засаглалын үеийн түүх, 1921-1990 оны БНМАУ-ын түүх, 1991-2018 оны өнөөгийн Монгол Улсын түүх гэсэн сэдвээр өрсөлдөнө. Шалгарсан шилдэг 6 баг Олон Улсын залуучуудын өдөр шийдвэрлэх шатанд өрсөлдөж аваргаа тодруулах юм гэж нийслэлийн ЗДТГ-ын Хэвлэл, мэдээлэл олон нийттэй харилцах хэлтсээс мэдээллээ.