Ерөнхий сайд Н.Учрал Эрүүл мэндийн сайдаараа УИХ-ын гишүүн Э.Батшугарыг нэр дэвшүүлсэн нь олон нийтийн анхаарлыг татаад байна. Эзэмшсэн мэргэжлээсээ тэс өөр салбарыг удирдах үүрэг хүлээсэн сайд Э.Батшугарын хувьд “Эмч нарын цалин, эрүүл мэндийн даатгалын сан асуудалтай байгаа тул энэ бүхнийг цэгцлэхэд санхүүч, эдийн засагч хүн хэрэгтэй гэж үзэн, Ерөнхий сайд намайг Эрүүл мэндийн сайдаар ажиллах санал тавилаа” гэсэн нь хамгийн зөв сонголт байж мэдэх талтай.

Учир нь өмнө нь Эрүүл мэндийн сайдад мэргэжлийн хоёр ч хүнийг томилоод энэ салбар дээшээ гараагүй. Харин ч бие биенээ буруутгаж, эрүүл мэндийн салбарыг өөрсдийн хувийн өмч мэт үзсэн гэж хэлэхэд хэтрүүлсэн болохгүй болов уу.

УИХ-ын гишүүд ч өнгөрсөн хугацаанд эрүүл мэндийн салбарт хөрөнгө оруулалт хийсээр байгаа ч ёроолгүй сав шиг алга болсоор байгаа нь хачирхалтай. Менежментийнх нь хувьд зөв удирдаж авч явах нь чухал байна гэдэг асуудлыг хөндөж ирсэн. Иймээс Эрүүл мэндийн сайдаар ажиллах үүрэг хүлээгээд байгаа УИХ-ын гишүүн Э.Батшугарын хувьд салбартаа очоод эдийн засагч, санхүүч мэргэжлээр суралцсаныхаа ид шидийг гаргаж ажиллах чухал цаг үе ирлээ. Салбарынхны цалинг нэмэгдүүлээд, Эрүүл мэндийн даатгалын сангаа алдагдалгүй болгоод авбал бас л том ажил нугалчихна шүү дээ.  Эрүүл энхийн манаанд зогсох ажлаа эмч, мэргэжилтнүүд яс гүйцэтгэчихнэ.