Орос даяар оюутнуудыг Украинд тулалдаж буй дроны ангиудад элсүүлэх хүчин чармайлт үргэлжилж байна. Оюутнууд дроны ангиудад оператор, инженерээр элсвэл их хэмжээний мөнгөн урамшуулал авна.

Түүнчлэн тус улсын Рязань мужийн компаниуд тодорхой квотын дагуу ажилтнуудаа армид элсүүлэх шаардлагатай болсон тухай саяхан хэвлэлүүд мэдээлсэн билээ. Гэхдээ сүүлийн үеийн эдгээр арга хэмжээ нь ерөнхий дайчилгааны кампанит ажлын нэг хэсэг биш гэж Кремль мэдэгдэж байна. Украины тал Оросын цэрэг татлагын хурдаас илүү хурдтайгаар цэргүүдийг нь устгаж байгаа гэж мэдэгдсэн ч Кремль үүнийг үгүйсгэсэн юм. Эсрэгээрээ тэд цэргийн дутагдалд ороогүй гэж мэдэгдэж буй.

Аюулгүйн зөвлөлийн дэд дарга Дмитрий Медведев өнөөдөр /2026.04.03/ хийсэн мэдэгдэлдээ "Сайн дурын элсэгчдэд санхүүгийн дэмжлэгийн багц санал болгодог цэрэг татлагын систем үргэлжилсээр байгаа. Өнгөрсөн жил 400 мянга гаруй хүн гэрээ байгуулсан бол энэ жил 80 мянга давчихсан явж байна" гэсэн юм.

Оюутнуудыг цэрэгт татаж байгаа, Рязань мужийн компаниудад квот тогтоосон гэх албан ёсны баримт бичгийг олж хараагүй гэдгээ Кремлийн хэвлэлийн төлөөлөгч Дмитрий Песков Пүрэв гаригт /2026.04.02/ мэдэгдсэн аж. Гэхдээ ерөнхийлөгч Владимир Путины тушаалаар өнгөрсөн жил байгуулагдсан шинэ анги болох Оросын дроны хүчинд оюутнуудыг элсүүлэхээр уриалж байгааг баталжээ. Албан ёсны баримт бичиг байхгүй ч гэлээ ажилтан, оюутан, ажилгүй хүн зэргээс үл хамааран цэрэгт элсэх нь нээлттэй гэдгийг тэр тодотгожээ.

Дроны операторууд ихэвчлэн фронтын шугамаас хол зайд ажилладаг боловч баригдсан тохиолдолд өндөр ач холбогдолтой байд тооцогддог.

Владивосток дахь Алс дорнодын холбооны их сургууль оюутнуудыг цэрэгт элссэн тохиолдолд нэг жилийн чөлөө олгох ба эргэж ирэхэд нь сургалтын төлбөрөөс чөлөөлөх амлалт өгчээ. Мөн байр, тэтгэлэг зэргийг амлаж байна. Москвагийн иргэний инженерчлэлийн их сургууль ч бас ижил төрлийн урамшуулал санал болгож байна. Тус сургууль албан ёсны цахим хуудсандаа оюутнуудад дроны оператор, инженер, техникийн мэргэжилтэн болох боломж байна гэдгийг санал болгожээ. Харин Санкт Петербург дахь Оросын ус цаг уурын их сургууль оюутнуудыг дроны оператор болвол жилд долоон сая рублиэр цалинжих боломжтой гэж цахим хуудсандаа бичсэн байна.

Их сургуулиуд шалгалтдаа унасан, өртэй оюутнуудыг дарамт шахалтад оруулж, армид элсэхэд хүргэдэг гэх албан бус мэдээлэл ч бий.