Нийслэлийн автозамын түгжрэлийг бууруулах, хөдөлгөөний аюулгүй байдлыг хангах хүрээнд Замын хөдөлгөөний удирдлагын төвөөс тээврийн хэрэгслүүдэд хийх хяналт шалгалтыг эрчимжүүлсэн. Тодруулбал, энэ сарын 1-ний өдөр замын хөдөлгөөнд оролцож буй тээврийн хэрэгслүүдийг телекамерын ухаалаг системээр шүүхэд нийт 184 тээврийн хэрэгсэл улсын дугааргүй буюу бүртгэлгүй дугаартайгаар хөдөлгөөнд оролцсон нь тогтоогджээ.

Тээврийн хэрэгслийн жолооч улсын дугааргүйгээр замын хөдөлгөөнд оролцоход Зөрчлийн тухай хуулийн 14.7.12 дахь хэсэгт заасны дагуу иргэнийг 25 нэгж буюу 25,000 төгрөгөөр торгож, хариуцлага тооцдог хуулийн заалттай. Мөн дугаар нь бүртгэлгүй эсвэл хуурамч байх нь цаашид гарч болзошгүй гэмт хэрэг, осол аваараас зугтах эрсдэлийг дагуулдаг тул хяналтыг өндөржүүлж байгааг албаныхан анхааруулж байна.

Замын хөдөлгөөний удирдлагын төвөөс жолооч нарт тээврийн хэрэгслийн улсын дугаарыг тодорхой харагдахуйц байрлуулж, засварлаж будахгүй байх, шинээр худалдан авсан болон түр дугаартай автомашиныг хуулийн хугацаанд нь амжиж бүртгүүлэх, замын хөдөлгөөний дүрмийг баримтлан хөдөлгөөнд соёлтой оролцохыг холбогдох албанаас уриалж байгаа юм.