Нэгэнтээ олонх, цөөнхөөрөө хуваагдсан МАН тохиролцоонд хүрч чадахгүй явсаар эцэстээ ринген дээр албан ёсоор гарав. МАН-ын Удирдах зөвлөл өнөөдөр хуралдаж, УИХ-ын даргад нэр дэвшигчийг тодруулсан бөгөөд ингэхдээ Д.Амарбаясгалан талаас С.Амарсайхан, Н.Учрал талаас С.Бямбацогт гэсэн нэр дэвшүүлэлт дээр санал хураах байв.

Өөрөөр хэлбэл, МАН-ын дарга Н.Учрал Д.Амарбаясгалан нар тохиролцож чадаагүй учраас намын Удирдах зөвлөлийн олонхоор С.Бямбацогтыг УИХ-ын даргад дэвшүүлж, намын бүлгээр хэлэлцүүлэв.

Д.Амарбаясгалан тэргүүтэй МАН-ын гишүүдийн зүгээс Засгийн газарт сайдын суудал авахгүй зөвхөн УИХ-ын даргын суудлыг авна гэсэн шаардлага тавьсан. Харин МАН-ын дарга, шинэ Ерөнхий сайд Н.Учрал УИХ-ын даргаа бус Засгийн газрынхаа танхимд сайдын суудал санал богосон. Гэвч талууд тохиролцохгүй байсаар Н.Учралын тал Удирдах зөвлөлөө хуралдуулав. Н.Учрал намын дарга болсны дараа намын Удирдах зөвлөлийн бүрэлдэхүүнээ шинэчилсэн. Ингэхдээ дийлэнх олонх нь Ерөнхийлөгч, Н.Учралын тал байсан. Тиймээс МАН доторх олонх талаас хэнийг ч дэвшүүлсэн ч сонгогдох нь тодорхой байсан учраас С.Амарсайхан нэрээ татсан. С.Амарсайхан нэрээ татсан нь МАН-ын бүлэгт Д.Амарбаясгалангийн тал буюу цөөнх орохгүй, цаашид байнгын хороо, чуулганы хуралдаанд ч оролцохгүй гэсэн үг. Үүнийг УИХ-ын гишүүн П.Сайнзоригийн ярианаас анзаарч болно. Тэрбээр намын эв нэгдлээ хангана гэчихээд олонхоороо асуудлаа шийдээд явж байгаа бол цаашид бүлгийн хуралд ч суух шаардлага алга гэсэн нь тодотгож байгаа юм.

МАН 38/30-аараа хоёр хуваагдсан байгаа. МАН-ын дарга Н.Учралын тал бол 38 гишүүн. Д.Амарбаясгалангийн тал 30 гишүүн.

Харин Д.Амарбаясгалангийн тал дээр Ардчилсан нам, Үндэсний эвсэл нэмэгдвэл 7 хоног гацаад байсан парламентын үйл ажиллагаа цаашид ч гацаж, Н.Учрал сайд нараа томилж чадах уу гэдэг асуудал хөндөгдөнө.

Тиймээс МАН-ын дарга Н.Учрал цаашид дахин цөөнх буюу 30-ын талтайгаа ойлголцох, УИХ дахь бусад намуудтай ойлголцохгүй бол цаашид төрийн бүх шатны ажил гацаанд орох эрсдэлтэй байна.

Дэлхийн геополитикийн асуудал, нефтийн үнийн өсөлт гээд цаг алдалгүй урагшлах, шийдвэр гаргах энэ чухал цагт МАН дотроо эв нэгдлээ хангаж, ойлголцож, тохирохгүй бол монголчууд нийтээрээ хохирох эрсдэл байгааг МАН-ынханд сануулмаар байна.

Ш.ЧИМЭГ