НЭМЭЛТ: 

МАН-ын Удирдах зөвлөл УИХ-ын даргад УИХ дахь МАН-ын бүлгээс хэнийг нэр дэвшүүлэх боломжтой талаар хэлэлцлээ. Тодруулбал, Засгийн газрын Хэрэг эрхлэх газрын даргын үүрэг гүйцэтгэгч С.Бямбацогтыг УИХ-ын даргад нэр дэвшүүлэх шийдвэрийг гаргажээ. Одоо УИХ дахь МАН-ын бүлэг хуралдаж, Удирдах зөвлөлөөс санал болгосон дээрх нэрээр бүлгийн гишүүдээр санал хураалгах юм.

УИХ-ын даргад горилж байсан Эдийн засаг хөгжлийн сайдын үүрэг гүйцэтгэгч Ж.Энхбаяр өнөөдөр сэтгүүлчдэд мэдээлэл өгөх үеэрээ "Би УИХ-ын даргад өрсөлдөхгүй. УИХ-ын даргаар ажлын болон парламентын туршлагатай хүн ажиллах ёстой" гэдэг байр суурь илэрхийлсэн юм.

МАН-ын Удирдах зөвлөл хуралдана

МАН-ын Удирдах зөвлөлийн хуралдаан өнөөдөр 09.00 цагт товлогдсон. Энэ хуралдаанаар УИХ-ын дараагийн даргыг тодруулах юм.

Одоогийн байдлаар УИХ-ын даргаар Д.Амарбаясгалангийн талаас Шадар сайд асан, УИХ-ын гишүүн С.Амарсайханыг зүтгүүлж байгаа бол нөгөө талаас Сангийн сайд  Б.Жавхлан, ЗГХЭГ-ын дарга С.Бямбацогт нар өрсөлдөж буй. УИХ дахь МАН-ын бүлэг олонх, цөөнх гэж талцсан учраас олонхын тал нь УИХ-ын даргаа авах уу, цөөнх нь авах уу гэдэг дээр өнөөдрийн хүртэл талцаж буй. Тиймээс өнөөдөр Удирдах зөвлөлийн хурал дээр эдгээр гурван хүнийг нэр дэвшүүлж, олонхоороо санал хураахаар яригдаж байна. Учир нь дээрх гурван нэр дэвшигчийн аль аль нь УИХ-ын даргад горилно, нэрээ татахгүй гэж байгаа учраас тохиролцоонд хүрч чадахгүй цаг алдаж байхаар Удирдах зөвлөлийн хуралдаанаар нэгийг нь сонгохоос өөр аргагүйд хүрсэн гэх мэдээлэл ч байна.

Улс төрийн хүрээнд УИХ-ын даргаа олонх нь аваад явна гэсэн тохиролцоотой байгаа ч Д.Амарбаясгалангийн зүгээс Засгийн газарт сайдын суудал авахгүй зөвхөн УИХ-ын даргаа авна гэсэн тохироо хийхээр яригдаж буй юм.

Ш.ЧИМЭГ