МАН-ын дарга Н.Учрал танхимаа бүрдүүлж чадахгүй байгаа шалтгааны нэг нь УИХ-ын даргын суудал. Дараагийн УИХ дарга нь хэн байхаас хамаарч сайд нарын томилгоо өрнөж, УИХ дээр яаралтайгаар хурдтай шийдвэрүүд гаргах зэрэг цаг алдаж болохгүй чухал үе ирээд байна. Гэвч МАН дотор олонх, цөөнх гэж талцаж, би УИХ-ын даргаа авна гэсэн фракц, талцлуудын хуваагдал ийнхүү гацаанд оруулаад байна. Хаврын чуулган нээлтээ хийсэн цагаасаа хуралдаж чадахгүй, нэг ч хуулийн төсөл баталж чадахгүй байгаа шалтгаан нь ердөө МАН олонх, цөөнх болсон, тэдэн дундаа сайд, дарга болох гэсэн эрх мэдлийн хуваарилалтаа хийж чадахгүйд байгаа юм.

Одоогийн нөхцөлд хамгийн чухал шийдвэр бол УИХ-ын дарга. Шинээр томилогдох УИХ-ын дарга нь намын олонх, цөөнхийг нэгтгэх, Ардчилсан нам болоод бусад улс төрийн намуудтай эв зүйгээ олоод Засгийн засгаас гаргуулах шийдвэрүүдээ УИХ дээр хамгаалаад бат зогсох тийм л спикер хэрэгтэй байгаа. Гэвч нэгэнтээ олонх, цөөнх болсон МАН дотор Д.Амарбаясгалангийн тал УИХ-ын даргаа томилуулах хүсэлтэй байгаа бөгөөд Шадар сайд асан М.Амарсайханыг зүтгүүлж буй. Өрнөж буй үйл явц, гацаа, засгаа бүрдүүлж чадахгүй байгаагийн шалтгаан ч Д.Амарбаясгалангийн талаас УИХ-ын даргаа томилуулах хүсэлт. Тиймээс одоо шинэ Ерөнхий сайд Н.Учралд гацаанаас гарах ганц гарц нь С.Амарсайхан болон хувирав.

С.Амарсайханы хувьд УИХ-д хоёр ч удаа сонгогдож, Шадар сайдын алба хашиж байсан. Түүнээс өмнө тэрбээр нийслэл гэх том айлыг удирдаж байсан. Улстөрчдийн хувьд сонгогдсон цагаасаа эхлэн аль нэг бүлэг фракц гэхээс илүү Д.Амарбаясгалантай ойр байсан нэгэн. Д.Амарбаясгалагийн талаас УИХ-ын даргаа томилно гэвэл өнгөрсөн хугацаанд улс төрийн олон нүүдэлд шийдэл, гарц олж, талууд хоорондын галыг намжааж, Л.Оюун-Эрдэнийн Засгийн газарт ажиллаж байсан гээд олон шалтгаан С.Амарсайханаас өөр сонголтгүй гэдгийг илтгэнэ. С.Амарсайхан ч улстөрчийн хувьд намын дотоод хагарал, зөрчилдөөн дээр асуудалд аль нэг фракц, бүлэг гэхээсээ илүү холч ухаанаар харж, хагарлыг зөөллөж, хананы хоёр талд гарсан бүлгүүдийг хооронд нь уулзуулж ирсэн зэрэг нь түүнийг улстөрчийн хувьд учир олж, зангилаа тайлж чадах хүн гэдгийг нь харуулав.

Улс орны эдийн засгаас илүү гадаад хүчин зүйл өнөөдөр Н.Учралыг Засгийн газраа хурдан байгуулж, яаралтай ажилдаа орж, хурдтай ажиллахыг анхааруулж байна. Тиймээс дотоод улс төр, талцал хуваагдлаа хойш хаяад нам доторх бүх фракц бүлэг, УИХ дахь улс төрийн намуудтай ойлголцоод явах, хамгийн чухал нь өөрийг нь УИХ дээр хамгаалаад зогсч чадах тийм л улстөрчийг УИХ-ын даргаараа томилоод цааш алхах хэрэгтэй байна. Үндсэндээ МАН дотор эрх мэдлийн "түймэр"-ийг олон талаас нь өрдөж байна. Тиймээс ч одоо Д.Амарбаясгаланд, Н.Учралд ч энэ түймрийг өрдөөд байх биш "цурманд оруулаад" цаашлах хүн С.Амарсайхан болов.

Т.ОД