ОХУ-ын Рязань мужийн эрх баригчид тодорхой тооны ажилчдаа гэрээний дагуу цэргийн албанд хамруулахыг бизнес эрхлэгчдэд тушаажээ. Тодруулбал, компаниудыг өмчлөлийн хэлбэрээс үл хамааран есдүгээр сарын 20 гэхэд цэрэг татлагын квот тогтоохыг үүрэгдсэн байна. Украины фронт руу тасралтгүй цэрэг нийлүүлэхийн тулд засгийн газар олон төрлийн хүчин чармайлт гаргаж буйн нэг нь энэ юм.

Квотыг компанийн хэмжээнээс хамааран тогтооно. 300 хүртэл ажилтантай компаниуд хоёр ажилтнаа гэрээтээр цэрэгт явуулах бол 500 ба түүнээс дээш ажилтантай компаниуд таван ажилтнаа явуулах ёстой. Тус квотыг биелүүлээгүй компаниудад ойролцоогоор нэг сая рубль буюу 12200 ам.долларын торгууль ногдуулна.

Компаниуд цэрэг татлагын квот тогтоох тухай мэдэгдлийг албан ёсоор ил тод дурдаж буй анхны тохиолдол энэ болж байна. Бүс нутгууд тусдаа ийм зарлиг гаргаж байсан ч олон нийтэд ил тод мэдээлж байгаагүй.

Тэгвэл цэргийн албанд татагдсан хүмүүсийг өмгөөлдөг хуульч Тимофей Васкин энэ загварыг хуулийн хувьд хэрэгжүүлэх боломжгүй зүйл хэмээн үзэж, шүүмжлэлтэй хандаж байна.

Дээрх зарлигийг ОХУ-ын албан ёсны хууль эрх зүйн цахим хуудсанд өнгөрсөн долоо хоногт нийтэлжээ. Тус нийтлэлд Путины сүүлийн үед гаргасан зарлигуудыг дурдсан бөгөөд үүнд Украины эзлэгдсэн бүс нутгуудад цэргийн онц байдал тогтоох зэрэг багтсан байна.