Шинээр томилогдсон Ерөнхий сайд Н.Учрал танхимаа бүрдүүлэхийн тулд намынхаа эв нэгдлийг хангаж, бүлэг фракциудын эрх ашгийг хангахын тулд сайд нар дээрээ эцэслэн тохирч чадахгүй өнөөдөртэй золгов. Угтаа бол Н.Учрал өнөөдөр шинэ Засгийн газар анхны хуралдаанаа хийнэ гэж байсан ч ийн тохиролцож чадаагүй учраас өнөөдөртөө сайд нараа эцэслэхээр ярьж байна. Хамгийн гол нь сайд нараас өмнө УИХ-ын даргаа томилох тохироо олон үйл явцыг гацааж байна.

МАН дотор УИХ-ын дарга хэн байхаас цаашдын Засгийн газрын хувь заяа ч тодорхойлогдож мэдэхээр байгаа юм. Учир нь МАН олонх, цөөнх гэж хуваагдсан бөгөөд УИХ-ын гишүүн Д.Амарбаясгалангийн зүгээс УИХ-ын дарга өөрийн хүнээ дэвшүүлнэ хэмээж байв. Гэвч олонх тал нь УИХ-ын даргаа томилж байж цаашид Засгийн газар тогтвортой байх, асуудлуудаа шийдээд явах боломж бүрдэх юм.

Тэгвэл олонх талаас дараагийн УИХ-ын даргад Засгийн газрын Хэрэг эрхлэх газрын дарга С.Бямбацогт, Сангийн сайд Б.Жавхлан нарын нэгийг нэр дэвшүүлэхээр яригдаж байна.

 Засгийн газрын Хэрэг эрхлэх газрын дарга С.Бямбацогтын хувьд бизнесийн салбарт ажиллаж, өөрийн “Нью прогресс” группээ үүсгэж байгуулан ажиллаж байгаад 2008 онд Ховд аймгаас УИХ-ын гишүүнээр томилогдсон. УИХ-д тав дахь удаагаа сонгогдож буй. Түүний хувьд УИХ дахь МАН-ын бүлгийн дарга, байнгын хорооны дарга, Хууль зүй, дотоод хэргийн сайд, Батлан хамгаалахын сайд, Зам тээврийн хөгжлийн сайдаар тус тус ажиллаж байсан бөгөөд Г.Занданшатарын танхимд Засгийн газрын Хэрэг эрхлэх газрын даргаар ажиллаж байгаад чөлөөлөгдөж буй. УИХ-д сонгогдох бүртээ нам нь ялсан үед сайдын албанд томилогдож байжээ. Харин энэ удаад тэрбээр ЗГХЭГ-ын даргын ажлаасаа буугаад УИХ-ын даргад нэр дэвшихээр горилж байна. Улс төрийн хүрээнд түүнийг хашиж болох бүхий л албан тушаалд очдог ч хийж, гийгүүлсэн гавьяа тун багатай гэх нь ч бий. Гэвч түүний хувьд УИХ-д тав дах удаагаа сонгогдсон, гурван салбар удирдаж байсан, хамгийн сүүлд Г.Занданшатарын Засгийн газрын гал тогоог барьжбарьж байв. Мэдээж улс төрд олон жил явсан туршлага, хашсан албан тушаалыг нь харвал түүнд УИХ-ын даргаас бусад бүхий л очиж болох албан тушаалыг хашсан учраас ийнхүү УИХ-ын дарга зүтгүүлж буй.

Сангийн сайд Б.Жавхлангийн хувьд тоо боддог хүн гэж тодорхойлдог. Монголбанк хянан шалгагчаас ажлын гараагаа эхэлж, тус банкны дэд Ерөнхийлөгчөөр ажиллаж байгаад 2016 онд Дархан-Уул аймгаас УИХ-д сонгогдсон. Түүнээс хойш гурав дахь удаагаа  УИХд сонгогдож буй. 2022 онд У.Хүрэлсүхийн Засгийн газар огцорсны дараа байгуулагдсан Л.Оюун-Эрдэнийн Засгийн газраас эхлэн саяхныг хүртэл Сангийн сайдаар ажилласан. Цар тахалтай жилүүдээ эхлээд Монгол Улсын эдийн засгийн томоохон өөрчлөлт, том тоонууд Б.Жавхлангийн автор. Өнөөдрийн эдийн засгийн өсөлт, төсөв санхүү, өр зээл гээд Монгол Улсын бүхий л тоо түүнд хамааралтай байж ирсэн. Улстөрчийн хувьд ч тэр Сангийн сайдын хувьд ч тэр сүүлийн хоёр Ерөнхий сайдын ярьдаг эдийн засгийн үзүүлэлтүүд, том тоонууд Сангийн сайдын ажил. Гэхдээ тэр танхимын тэргүүнээсээ түрүүлж дугарч, өөртөө наадаггүй нэгэн. Улс төрчийн хувьд төсөв баздаг, олон УИХ-ын гишүүдийн ашиг сонирхол, аль нэг нам, бүлэг фракцийн гэхээс илүү парламентын гишүүдийнхээ аашийг олоод сурчихсан, эв нэгдлээ хангаад, Засгийн газрынхаа ажлыг хамгаалаад явах боломжтой гэж үзэж энэ удаад УИХ-ын даргад зүтгүүлж буй.

Ш.ЧИМЭГ