АНУ, Израиль улсууд Иранд дайн эхлүүлснээс хойш бүс нутгийн дор хаяж есөн оронд олон мянган хүн амь үрэгдсэн. Үүний зэрэгцээ дэлхий дахинд эрчим хүчний хямрал нүүрлээд буй.

Харамсалтай нь, дайны цар хүрээ улам л тэлж, нөхцөл байдал улам л дордох төлөвтэй болоод байна. Тодруулбал, Иран улс Саудын Араб, Кувейт, Бахрейн, Катар, Арабын нэгдсэн Эмират, Оман улсууд руу олон тооны дрон, пуужин харвасан билээ. Гэвч эдгээр улсын аль нь ч одоогоор Ираны эсрэг хариу арга хэмжээ аваагүй байна.

Пакистаны армийн өндөр албан тушаалтан асан Мухаммад Саеед хэлэхдээ "Саудын Араб маш их тэвчсэн. Хэрвээ Саудын Араб цэргийн хүчээр хариугаа авбал ганцаараа хөдлөхгүй. Энэ нь бүс нутгийг тэр аяар нь галд автуулах болно" гэсэн юм.

Өөрөөр хэлбэл, Саудын Араб дайнд оролцоод эхэлбэл энэ нь зөвхөн Арабын орнууд гэлтгүй дэлхий дахинд нөлөөлнө.

Тус улс 2025 онд Пакистантай харилцан батлан хамгаалах гэрээ байгуулсан. Пакистаны ерөнхий сайд өнгөрсөн Ням гаригт /2026.03.29/ Исламабад хотноо Саудын Арабын Гадаад хэргийн сайдтай уулзахдаа холбоотныхоо гайхалтай тэвчээрийг магтан сайшаажээ. Мөн Пакистан улс хэзээд Саудын Арабтай мөр зэрэгцэн зогсох болно гэж амлалт өгсөн байна.

Хэрвээ Иран улс Саудын Арабын тэвчээрийг чинээнд нь тулгавал цөмийн зэвсэгт холбоотон нь босч магадгүй юм.

Одоогоор Пакистан дайн хүсэхгүй байгаа болов уу. Яагаад гэвэл Энэтхэг, Пакистан улсуудын дөрвөн өдрийн дайнаас хойш нэг жил ч болоогүй байна. Үүний зэрэгцээ Пакистаны цэргийнхэн хөрш зэргэлдээ Афганистанд Талибаны бүлэглэлтэй хэдэн сарын турш хил дамнасан мөргөлдөөнд оролцож байна.

Гэхдээ Пакистанд мөргөлдөөнийг намжаах сонирхол бий гэж үздэг. Иран улс хөршүүд рүүгээ дрон, пуужин харваснаас болж бүс нутагт цөөхөн найзтай үлдсэн. Харин Ирантай хамгийн асуудал багатай байдаг гэдгийг Вашингтон дахь Ойрхи Дорнодын бодлогын зөвлөлийн зөвлөх Камран Бохари хэлжээ. Түүнчлэн Пакистаны Гадаад хэргийн сайдын хэлснээр энэ мөргөлдөөн үргэлжилбэл үхэл, сүйрэл л нэмэгдэнэ.

Үүнийг ойлгосон учраас Турк, Саудын Араб, Египетийн топ дипломатчид Ням гаригт Пакистаны нийслэлд чуулсан аж. Уг хэлэлцээний эцэст АНУ-Ираны энхийн яриа хэлэлцээг Пакистан зуучлан зохион байгуулах боломжтой гэж үзсэн. Пакистан хэлэлцээг хөнгөвчилж чадна гэдэг дээр Иран, АНУ хэн хэн нь санал нэгдсэн аж. Мөн ойрын өдрүүдэд энхийн хэлэлцээний асуудлаар уулзалт болж магадгүй гэжээ.