Хууль зүй, дотоод хэргийн сайдын үүрэг гүйцэтгэгч Б.Энхбаярыг Авлигатай тэмцэх газар/АТГ/-т шалгуулах хүсэлт гаргасан талаар МАН-ын гишүүн Б.Цогтгэрэл өнөөдөр /2026.03.30/ мэдээлэл өглөө.

Тэрбээр "Хууль зүй, дотоод хэргийн яамнаас “Эм Жи Эл Корпораци” ХХК руу нийт 7 тэрбум 965 сая төгрөг шилжүүлсэн асуудлаар АТГ-т гомдол гаргаж байна. Энэхүү мөнгийг шилжүүлэх үед Хууль зүй, дотоод хэргийн сайдаар ажиллаж байсан Б.Энхбаярт гомдол гаргасан.  Тус асуудалд бусдад давуу байдал олгосон, үгсэн хуйвалдсан, мөн төсвийн мөнгийг зориулалтын бусаар ашигласан байж болзошгүй гэж иргэд бид үзэж байна. Мөн өөр нэг ноцтой асуудлыг шалгуулахаар өгч байгаа. Тухайлбал “Эм Жи Эл Корпораци” ХХК-ийн байранд Б.Энхбаяр сайдтай холбоотой хүмүүс мөнгө авч байсан гэх мэдээлэл байгаа. Энэ асуудалтай холбоотой дүрс бичлэг, гэрчийн мэдүүлэг зэрэг баримт материалыг мөн АТГ-т өгсөн. Хууль зүй, дотоод хэргийн сайд Б.Энхбаяр тийм бичлэг байхгүй гэж тайлбар хийсэн. Тийм бол таныг хүрэлцэн ирж тухайн бичлэгийг үзэхийг хүсэж байна. Нийт 7 тэрбум 965 сая 931 мянган төгрөгийг гурван удаагийн гүйлгээгээр тус компанид шилжүүлсэн байна. Хамгийн ноцтой нь шилэн дансны мэдээллийг устгасан бөгөөд шүгэл үлээгчийн мэдээлэл олон нийтэд түгсэний дараа буцаан байршуулсан. Буцаан байршуулахдаа мэдээллийг Шүүхийн шийдвэр гүйцэтгэх газрын шилэн дансанд нөхөж хийсэн. Эдгээр асуудлыг хууль, хяналтын байгууллагууд шалгаж, үнэн зөвийг тогтооно гэдэгт итгэж байна. Би энэ асуудлыг 2023 онд анх тавьж байсан. Тухайн үед сэтгүүлч н.Оргилмаа энэ талаар мэдээлж байсан ч мэдээллийн урсгал их байснаас иргэд төдийлөн анзаараагүй өнгөрсөн. Үүний дараа Ерөнхий сайд асан Л.Оюун-Эрдэнэ 5 тэрбум төгрөгийн асуудлыг сөхсөн. Хууль зүй, дотоод хэргийн яамнаас 50 орчим тэрбум төгрөгийн авлагатай иргэд, аж ахуйн нэгж байгууллагууд байдаг. Энэ мөнгө хохирогчдод очихын оронд хаагуур зарцуулагдсан нь гайхшрал төрүүлж байна" гэв.