Тайванийн гол сөрөг хүчин болох Гоминданы намын дарга Чен Ли Вуныг ирэх сард Хятадад айлчлахыг Ши Жиньпин урьжээ. Чен Ли Вун өнгөрсөн оны арваннэгдүгээр сард албан тушаалаа хүлээж авсан бөгөөд удахгүй АНУ-д албан ёсны айлчлалаа хийх аж. Гэвч тус айлчлалаас өмнө Хятадыг зорихоор болж буй нь гадаад, дотоодын шүүмжлэгчдийн анхааралд өртөөд байна. Түүнийг Хятадыг хэтэрхий дэмжиж байна гэж шүүмжлэгчид буруутгажээ.

Гоминданы нам Хятадтай илүү ойр дотно байж, харилцдаг. Чен Ли Вун Хятадын даргын урилгыг баяртайгаар хүлээж авсан гэж намын албан ёсны мэдэгдэлд дурджээ. Тайванийн Гоминданы намын удирдагч 2016 оны арваннэгдүгээр сараас хойш анх удаа Хятадад айлчлах гэж буй нь энэ юм.

Чен Ли Вун тэргүүтэй Тайванийн төлөөлөгчид дөрөвдүгээр сарын 7-12-ны өдрүүдэд Жянсү муж болон Бээжин, Шанхайгаар айлчилна. Гэхдээ айлчлалын хүрээнд Ши Жиньпинтэй биечлэн уулзах эсэх нь хараахан тодорхой болоогүй байна.

Тайванийн орон нутгийн сонгууль энэ оны сүүлээр болно. Чен, Ши нарын уулзалт сонгогчдын эсэргүүцлийг өдөөж магадгүй гэж болгоомжлох нэгэн ч байна.

Чен энэ айлчлалынхаа талаар ярихдаа "Ши Жиньпинтэй хэлэлцээ хийх нь бэлгэдлийн чухал агуулгатай. Тайванийн хоолойд энх тайвныг тогтоох үндэс суурь ч болж магадгүй. Бараг бүтэн зууны турш хуримтлагдсан тэр бүх асуудлыг ганц уулзалтаар шийднэ гэдэгт би итгэхгүй байна. Гэхдээ шийдэлд хүрэх гүүрийг бий болгоно гэдэгт найдаж байна" гэжээ.