УИХ-ын Төрийн байгуулалтын байнгын хороо, УИХ-ын Эдийн засгийн байнгын хорооны хамтарсан хуралдаанаар өнөөдөр /2026.03.30/ Монгол Улсын Засгийн газрын 2024-2028 оны үйл ажиллагааны хөтөлбөрийн 2025 оны гүйцэтгэлийн тайлан, Монгол Улсын хөгжлийн 2025 оны төлөвлөгөөний гүйцэтгэлийн тайланг хэлэлцэж байна.

Хяналт-шинжилгээний дүнгээр тус хөтөлбөрийн хавсралтаар баталсан бодлогын  13 үр дүнгийн 2025 оны хэрэгжилт 55.5 хувь, 2028 оны  зорилтот түвшинтэй харьцуулахад өссөн дүнгээр 30.7 хувь, хөтөлбөрийг хэрэгжүүлэх арга хэмжээний төлөвлөгөөний хавсралтаар баталсан төсвийн ерөнхийлөн захирагчийн үр дүнгийн хэрэгжилт 64.1 хувь, өссөн дүнгээр 46.4 хувь, үйл ажиллагааны төлөвлөгөөний 575 зорилтын хэрэгжилт 66.4 хувь, өссөн дүнгээр 38.0 хувь, арга хэмжээний хэрэгжилт 67.9 хувь, өссөн дүнгээр 38.8 хувь байна.

Монгол Улсын хөгжлийн 2025 оны төлөвлөгөөний гүйцэтгэлд хийсэн хяналт-шинжилгээ, үнэлгээний дүнгээр тэргүүлэх чиглэлийн үр дүн 48.5 хувь, төсвийн ерөнхийлөн захирагчийн үр дүн  59.7 хувь, хөтөлбөрийн үр дүн 57.1 хувь, нийт төсөл, арга хэмжээний гүйцэтгэл дунджаар 61.0 хувийн гүйцэтгэлтэй гарчээ.

Дээрх тайлантай холбогдуулж гишүүд асуулт тавьж, хариулт авав.

УИХ-ын гишүүн Ц.Туваан:

-Алт цэвэршүүлэх үйлдвэрийн ажил ямар шатандаа явж байгаа вэ. Компани нь шалгарсан уу?

Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэв:

-Алт цэвэршүүлэх үйлдвэрийн төслийг хэрэгжүүлэхээр ажиллаж байна. Өмнө нь Казахстан улстай байгуулсан 35 сая ам.доллар нь 70 сая ам.доллар болсон. ТЭЗҮ дээрээ мэргэжлийн зөвлөл хүлээн авах боломжгүй технологийн асуудал бий болсон. Шинээр ажлын хэсэг байгуулагдаад Г.Дамдинням сайд ахлаад ажиллаж байна. Ажлын хэсэг Герман,  Английн компаниудтай уулзаж, техник технологийн шийдлийг нь судалсан. Төр, хувийн хэвшлийн түншлэлээр хэрэгжүүлэх нь зүйтэй гэж үзсэн.  Уг төсөл хэрэгжсэнээр жилдээ 20 тонн алт, 30-50 тонн мөнгө цэвэршүүлнэ. Мөн  ховор металлыг ялгаж авах боломжтой болно. Бодлогын хувьд төслийг хэрэгжүүлэх нь зүйтэй гэж үзсэн. Герман болон Английн хоёр компани оролцох хүсэлтээ илэрхийлсэн. Төслийн өртөг 23сая ам.доллараас  46 сая ам.долллар хооронд байж болох. 7 -15 жилийн хооронд үйл ажиллагаагаа хэрэгжүүлээд хүлээлгэж өгөх нөхцөл тавьж байгаа.  Хөрөнгө оруулалтын тухай хуулийн дагуу явахаар буцаад төрд хүлээлгэн өгөх гэдэг асуудал нь тодорхойгүй тусгагдаж байгаа учраас төр хувийн хэвшлийн түншлэлийн хүрээнд компаниудын тавьж байгаа саналыг аваад явах боломжтой гэж үзсэн. Төр хувийн хэвшлийн түншлэлийн төв дээр ажлын хэсэг байгуулах саналаа Эдийн засаг хөгжлийн яамтай хамтраад гаргаж байгаа.

Г.ХОРОЛ