Засгийн газар шинээр бүрдэх бүрд туршлагатай нэрийн дор арга зальтай гишүүд Төрийн ордны хонгилоор хурдалдаг жамтай. МАН-ын дарга Н.Учрал Монгол Улсын 35 дах Ерөнхий сайд болох нь тодорхой болж, Засгийн газрын танхимаа шинээр бүрдүүлэх нь цаг хугацаа асуудал болсон энэ үед “ах нар” гэгддэг тэд дахин сайдын суудал горилон гүйлдэж эхлэв. “Ах нар” Засгийн газрын томилгоонд нөлөөтэй Ерөнхийлөгчөөс эхлээд өөрсдийн бүлэг фракц, дүү гишүүдийнхээ хаалгыг татан дэмжлэг хүсэж, амлалт өгч яваа ажээ.

Улс орны гэхээс илүүтэй арыг нь даадаг групп компани, бүлэглэлийн эрх ашгийг төрд төлөөлж суудаг “ах нар” энэ удаад “Засгийн газрын бодлого тогтвортой байх ёстой” гэх агуулга түгээж эхэлсэн. Тэдний жагсаалтыг Эдийн засаг, хөгжлийн сайд Ж.Энхбаяр, Шадар сайд сайд Т.Доржханд, Гадаад харилцааны сайд Б.Батцэцэг, Зам, тээврийн сайд Б.Дэлгэрсайхан нар тэргүүлж байна. Ерөнхийдөө шинэ зүйл гарахгүй, хуучирсан хэд.

Зарим “ах нар” сүүлийн хэдхэн жилд 3-4 удаа гулсан сайдын суудлаа хадгалж, Монголын улс төрд дээд амжилт тогтоогоод байгаа. Ямар сайндаа л намынхан нь хүртэл “Монголын төр энэ ах нарт өртэй биш дээ” хэмээн шүүмжилдэг болсон. Энэ жишгээр “ах нар” өөрсдийгөө Засгийн газар солигдох бүрд сайдаар өргөмжилдөг. Хэрэв Засгийн газрын танхимд суудлаа хадгалж чадахгүй бол яам сэлгэж оршсоор хийсэн ажилгүй, үзүүлэх үр дүнгүй өдөр хоногийг өнгөрөөж ирсэн. Яам солих бүрдээ дагуулж явдаг цүнх баригчдаа хоолтой байлгахын тулд халаа сэлгээг дур зоргоороо хийдэг. Танихгүй салбарт очсон даруйдаа өөрт нь таалагдахгүй төсөл, хөтөлбөрийг нэг удаагийн шийдвэрээр зогсоох зэргээр төрийн бодлогын залгамж, тасралтгүй ажиллагааг гацаадаг.

Зөвхөн төрийн ажлыг гацаагаад зогсохгүй Ерөнхий сайдын бодлого, ажлыг ч гуйвуулдаг аргад гаршсан. Үүнийгээ “тогтвортой байдал” гэдэг хоёрхон үгээр халхавчилж, аль нэг салбарын зөвшөөрлийг атгаж байх сонирхлоо гүйцэлдүүлдэг. Хэрэв “ах нар” Н.Учралын тэргүүлэх Засгийн газарт дахин гулсаж, сайдын суудал бөглөсөн тохиолдолд төрийн ажлыг авлигажуулж, ашиг сонирхлоо шингээн гацаадаг, нэг бүлэглэлд үйлчилдэг завхрал үргэлжилнэ гэсэн үг. Тиймээс л Ерөнхий сайд асан Л.Оюун-Эрдэнэ “Н.Учралд хандаж хэлэхэд, эрх мэдлийг хэнтэй ч битгий хуваалцаарай” хэмээх захиасаа хэлсэн байх.

Сонгуулийн циклийн дагуу Ерөнхий сайдаар томилогдох Н.Учралд эрчтэй ажиллах бүтэн хоёр жилийн хугацаа хүлээж байна. Багагүй хугацаа. Улс орны нийгэм, аж ахуйн байдлыг сайжруулахад хангалттай хугацаа. Энэ утгаараа намын төдийгүй Монголын залуусын төлөөлөл болж, МАН-ын даргаар сонгогдсон Н.Учралаас хүлээх нийгмийн хүлээлт өндөр байгаа. Харин “ах нар” л тэр хүлээлтийг замхруулна.

Р.Болд