Хойд Солонгосын удирдагч Ким Жон Уны охин Ким Чу-Аэгийн үсний засалтыг дуурайх нь хууль бус үйлдэлд тооцогдохыг шинэ хуулиар баталгаажуулжээ. Удирдагчийн хамгийн хайртай хүүхэд гэж нэрлэгдээд буй Ким Чу-Аэгийн нэр хүнд сүүлийн үед улам өссөөр байна. Тэрбээр нийт 61 удаа олны өмнө гарч ирсэн бөгөөд олны нүдэн дээр жаахан хүүхдээс өөртөө итгэлтэй өсвөр насны охин болтлоо томорчээ.

Шинэ хуулийн дагуу түүний үсний засалтыг дуурайсан хүний үсийг тэр дор нь тайрч, хөдөлмөрийн лагерьт зургаан сар цөлөх аж.

Энэ мэдээ хөрш Өмнөд Солонгост ихээхэн шуугиан дэгдээгээд байна. Нэгэн эх сурвалж хэлэхдээ "Хойд солонгосчууд дүрэм журам, эдийн засгийн хүнд бэрхийг арай ядан даван туулж байхад удирдагчийн охин чухал арга хэмжээнүүдэд оролцохдоо үнэтэй хувцас өмссөн байдаг нь ард иргэдийг гонсойлгох болсныг тэндэхийн хүмүүсээс дуулсан" гэжээ.

Өмнөд Солонгосын цэрэг, аюулгүй байдлын мэргэжилтэн Пол Чойгийн хэлснээр удирдагч Ким Жон Ун охин руугаа олон нийтийн анхаарлыг татаж байгаа нь санаандгүй хэрэг биш. Хойд Солонгост цэргийнхний дэмжлэгийг авах нь нэн чухал байдаг учраас тэдэнд охиноо жинхэнэ удирдагч гэж итгүүлэхийг хүсч байна. "Ким Жон Ун өөрт нь болон охинд нь үнэхээр үнэнч байх хүмүүсийг сайн мэдэхгүй байгаа. Тэр охиноо ирээдүйд хамгаалахын тулд одооноос бэлтгэж байна. Ингэснээр охин олон нийтийн дэмжлэгийг цуглуулахын зэрэгцээ итгэлцлийг бий болгоно" гэж Пол Чой хэлжээ.

Ким Чу-Аэ охин өсвөр бага насных хэдий ч мэргэн буучийн буугаар буудаж, цөмийн пуужингийн туршилт, цэргийн парадад оролцон, төрийн айлчлалуудын үеэр байлцдаг. Түүний аав Ким Жон Уныг анх засгийн эрхэнд гарахад хууччуул эрх мэдэл, хүч чадалд нь эргэлзэж байлаа. Тухайн үед Ким Жон Ун Өмнөд Солонгосын тэнгисийн цэргийн онгоцыг дэлбэлэх шийдвэр гаргаснаар тэдний эргэлзээг тайлсан гэж үздэг. Тус дэлбэрэлтээр 46 хүн амь үрэгдэж байжээ. Эцгийн эрхт ёс давамгайлсан нийгэмд Ким Чу-Аэ охин ч бас аавтайгаа адил сорилттой тулгарна гэж цэргийн шинжээчид таамаглаж байна.